இராதே

இராதே
eradevadassou

வெள்ளி, 5 அக்டோபர், 2018

தலைமைப்பொறிஞர் சுபாசு சந்திரபோசு



மேனாள் தலைமைப்பொறிஞர் சுபாசு சந்திரபோசு

                               (காவடிச்சிந்து)


சிந்தைசெ றிவுடை அறிஞர் ! - தலைமைப்                                 
                                 பொறிஞர் ! - அறிவு
                                 வினைஞர் ! - நட்பு
     சிந்துத் தமிழ்பாடும் கவிஞர் ! - பண்புத்
          திறம்பாடிடும் உயர்வானவர்
          அறமேவியே நமையாள்பவர்
     செம்மன நற்புகழ் போசு ! - அவர்
     செயல்களின் வல்லாண்மை பேசு !


சொந்தங்கள் உள்ளத்தைத் தொடுவார் ! - உறவை
                                                           நடுவார் ! - இன்பம்
                                                          இடுவார் ! - அன்பு
     சுடராலே தவறுகள் சுடுவார் ! -
புசுபா
          துணையோடிவர் பலஆண்டுகள்
          மனைமேவியே நலமாமுயர்
     துலங்கிடும் பொன்வாழ்வு பெறுவார் ! - மணத்
     துணையோடு யாவர்க்கும் அருள்வார் !

தந்திடும் சீர்குண சீலர் ! - மண
                               வாளர் ! - நேர்மை
                               யாளர் ! - கொடை
     தந்திடும் அரிமாவின் வேலர் ! - தொண்டின்
          தடமாகியே பணிமேவிடும்
          இடமாகியே எளியோரெழ
     தன்னையே ஈந்திடும் மாரி ! - இவர்
     தரணியில் இன்னுமோர் பாரி !

சந்திர போசுஐயா  வெல்க ! - மேன்மை
                                  கொள்க ! - நன்மை
                                       மல்க ! - திறமை
     சந்தித்த வழியாவும் சொல்க ! - திண்மை
          சதிராடிடும் உலகாரொடும்
          மதிமேவிடும் உறவாரொடும்
     சந்தனப் பொன்வாழ்வு காண்க ! - பீடு
     சான்றாண்மை பட்டங்கள் பூண்க !

                                                                - இராதே

வியாழன், 4 அக்டோபர், 2018

நூலகம்



நூலள வாகும்நுண் ணறிவு ! - உயர்
     நூலகம் செல்லுதல் செறிவு ! - மட
          நுணலாகவே அறியாமையின்
          அணைநிற்பவர் இருள்நீக்கிடும்
               விளக்கு ! - மனத்
               துலக்கு !

காலநி கழ்வுகள் சொல்லும் ! - நிகழ்
     காலநி ரல்களும் துள்ளும் ! - செய்திக்
          களமாகிடும் நிலமாகியே
          வளமேவிடும் கருவூலமாய்
               கொள்ளும் ! - உளம்
               விள்ளும் !

சிந்தைவ ளம்பெற நாடு ! - குணந்
     தேறநன் நூலினைத் தேடு ! - மூளை
          தெளிவுற்றிட வடிவுற்றெழ
          ஒளிபெற்றிட அறிவுற்றெழக்
               கூடு ! - படி
               ஏடு !

விந்தையில் நல்லுணர் வேறும் ! - கல்வி
     வீரிய செல்வமாய் மாறும் ! - ஆற்றல்
          மெருகேரிட உருவாகிடும்
          அருமைநலன் மிகவேமதி
               ஊறும் ! - புகழ்க்
               கூறும் !

நுண்ணிய நூல்பல அறியும் ! - கலை
     நூல்களின் நுட்பங்கள் புரியும் ! - நுண்மை
          நுகர்வோரிடை உறவாடிட
          தகவோர்நிலை நிறைவாயுறத்
               தெரியும் ! - தேடல்
               விரியும் !

எண்ணமெ ழில்பெறுங் கிடங்கு ! - தரும்
     ஏடுப யன்பல மடங்கு ! - நாளும்
          இனிதாகவே அறிவேபெற
          நனிநூலகப் படியேறிடத்
               தொடங்கு ! - அகம்
               அடங்கு !

                                                 - இராதே

புதன், 3 அக்டோபர், 2018

கொசு


( காவடிச்சிந்து )

மாலையோடி ரவிலுமே
     மாந்தரின்கு ருதியையே
     மாந்திடப்ப றந்துவரும் துன்பமாம் ! - புவி
     மானிடர்க்கு ருதியதற் கின்பமாம் !

சோலையாம்பூ விதழ்களில்
     தோன்றிடும்பூந் தேனினையே
     சுவைத்துண்டே வாழுதே நுளம்புதாம் ! - நோய்த்
     தொற்றரக்கர் தூதராய் விளம்புதாம் !

ஊசியாம்கு ழல்கள்நீட்டி
     உடலினில்ம யக்கம்பாய்ச்சி
     உறிஞ்சும்கு ருதித்தேடல் வேட்டையாம் ! - தம்
     உறவைப்பெ ருக்குகின்ற சேட்டையாம் !

வீசிடும்இ றக்கைகொண்டு
     விரவும்ம ணங்கள்கொண்டு
     விதைக்குமே நோய்களைப்பெண் கொசுக்கள் ! - அவை
     விதியினை முடிக்கும்காலன் சிசுக்கள் !

பற்றுமாம் மூளைக்காய்ச்சல்
     பரவுமாம் டெங்குக்காய்ச்சல்
     பரிசாகக் கொசுத்தருங் கொடையாம் ! - இவை
     பாமரரை மாய்க்கும் கழி சடையாம் !

முற்றுமா னைக்கால்நோயுமே
     முணறும்ம லேரியாவுமே
     முத்தமிடும் கொசுக்கொடுக்கும் வினையாம் ! - நாம்
     முயன்றால் தடுக்கலாம்இ தனையாம் !

வீட்டினையும் தூய்மைசெய்து
     வீதியையும் தூய்மைசெய்து
     விரட்டியேது ரத்திக்கொசு ஓட்டுவோம் ! - இனம்
     வேரறுக்க பல்வழிகள் தீட்டுவோம் !

தீட்டியநம் சிந்தையாலும்
     தெளிந்தநல் லறிவாலும்
     திட்டமிட்டே கொசுவினை ஒழிப்போம் ! - என்றும்
     திரும்பாவ கைகள்கண்டே அழிப்போம் !

                      - இராதே

செவ்வாய், 25 செப்டம்பர், 2018

அலைகடல்





                    எடுப்பு
அலைக டலாடிட வேண்டும் - வெள்
          ளலையொ டெங்கணு மாயினும் நீந்தியே               ( அலை )

                    தொடுப்பு

அலையின்வ ளைவில்நெளி வில்மகிழ உடனே
          ஆடிடும் பால்நுரை யுடன்நாம் எழவே                       ( அலை )

                     முடிப்பு

நீரில்ந னைந்தவுடன் நெஞ்சம்நெ கிழவுபெறும்
          நேரம திலும்தூர பாதைப்ப யணத்திலும்
வீரரும் முழுகும் நீரரங் குகளிலும்
          வீசல்க ளிலும்மிசை பாய்ச்சல் களிலும்பொங்கும் ( அலை }


                                                                                                          -இராதே

சனி, 22 செப்டம்பர், 2018

குட்டித் தவளை

குட்டிக் குட்டித் தவளை
எட்டி எட்டிப் பார்க்கும் ;
குளத்துத் தண்ணிக் குள்ளே
குட்டிக் கரணம் போடும் ;
சத்தம் போட்டு மழையில்
சரள மாகப் பாடும் ;
கொத்தும் பாம்பின் இரையாய்க்
குரலால் மாட்டிக் கொள்ளும் !
- இராதே

வெள்ளி, 21 செப்டம்பர், 2018

கார் காலம் ( காவடிச் சிந்து )

விண்ணிருந்  துமண்ணில்  தூவுதே !
                                                  பருவமழை
                                                  பயிர்வளர்செய்
     விந்தை  யுடன்வயல்  மேவுதே  ! - வெல்லும்
                         மின்னொலிமலர்  வண்ணமேசுடர்
                         சொன்னமேயென  முன்னமேவளர்
     மென்விளை  வைஈனும்  மழையே  !
                                                 பெருவிளைச்சல்
                                                 தனைவிளைக்க
     வில்லையெ  னில்பெரும்  பிழையே !




மன்மதன்  கைக்கணை  சரமாம் !
                                                  அதிவிரைவில்
                                                  பரவிவிழ
     மண்வளத்  தைப்பேணும்  வரமாம்  ! - பொங்கி
                         வந்தநீர்நிலை  நின்றுமேலெழ
                         உந்துசேர்வழி  அண்டிசேர்ந்துழ
     வயல்வழி  யநீரின்  வரவே !
                                                  நனையநிலம்
                                                  முளைபயிர்கள்
     வளர்வது  வும்இயற்கை  உறவே  !



தண்ணீரோ  டவாய்க்கால்  காணுதே !
                                                 வழிநெடுக்க
                                                 தனைமறைத்தும்
     தங்குமி  டம்நாடி  பூணுதே  ! - தூர்ந்த
                         தன்நிலைவழி  மண்ணெடுத்திட
                         சென்றுசேர்கையில்  உண்டநீர்நிலை
     தன்னிறை  வில்பாடல்  பாடுதே !
                                                 அலையெழும்பிக்
                                                 கரைபுரள
     'தந்தனத்  தோம்'தாளம்  போடுதே  !



புன்னகையாய்  வெள்ளம்  பாயுதே  !
                                                  மனமகிழ்வில்
                                                  தினநெகிழ
     பூரிப்பி  லேஉள்ளம்  சாயுதே  ! - வந்த
                         பெண்ணிணைகுயில்  வண்ணமாமயில்
                         மண்ணிலேவிழும்  சின்னப்பூவிதழ்
     பூப்படைந்  தேநெஞ்சம்  மீட்டுதே  !
                                                  மழைப்பருவம்
                                                 மயங்கித்தொழப்
     புத்துணர்  வில்இன்பங்  கூட்டுதே  !


                                                                       - இராதே




                                                  

வியாழன், 20 செப்டம்பர், 2018

சாலை விதிகள் ( காவடிச் சிந்து )


சாலைத் தெருக்களில் நள்ளியே - நல்ல
          சட்டம் மதியாமல் எள்ளியே - சீறும்
          சாலச் சறுக்களில் துள்ளியே - வண்டித்
                    தடுமாறிட அடங்காமலே
                    நடுவீதியில் இடந்தாவியே
          சட்டென இடிபடத் தள்ளியே - மக்கள்
          சாவவே வைக்கிறாய்க் கொள்ளியே !

மாலை மயக்கத்தை நீட்டியே - மது
          மதியதன் பேச்சினைக் கேட்டியே - மன
          மகிழ்வினில் முடுக்கங்கள் கூட்டியே -விதி
                    மதிப்போரையும் நடப்போரையும்
                    மதிமாறியே தடம்மாறிட
          மரணத்தின் ஓலையைத் தீட்டியே - மாந்தன்
          மண்டையைப் பிளக்கிறாய் ஓட்டியே !

தொங்கியே பேரூந்தில் செல்லாதே - படி
          தொற்றிக் கொண்டுநீ நில்லாதே - பெருந்
          துன்பத்தை நொடியினில் புல்லாதே - சாலை
                    விதிமீறியே தடுமாறிட
                    சதிவேலையில் கொடுமையுறு
          தொல்லைகள் தரும்வழி கல்லாதே - வாழ்வின்
          தொடக்கத்தில் இன்பங்கள் கொல்லாதே !

பாங்குடன் வாழ்வதே சுகவாசி - தெரு
          பயணத்தில் ஏன்தானோ செல்பேசி - சவ
          பாடையை நாடவா அலைபேசி - நாளும்
                    பலர்கூடிடும் தெருகூடலில்
                    நிலைமீறிடும் விழிமூடியப்
          பயணங்கள் மாய்த்திடும் அதைவாசி - இதன்
          பக்குவம் அறிந்திட நீயோசி !

                                                                       - இராதே

செவ்வாய், 18 செப்டம்பர், 2018

பார் ! பார் ! நல்லா பார் !




கூடு கட்டும் குருவி பார் !
     கூடி வாழும் காகம் பார் !
ஆடு கின்ற மயிலைப் பார் !
     அழகாம் அணிலின் ஓட்டம் பார் !
பேடு கொஞ்சும் குயில்கள் பார் !
     பேசு கின்ற கிளிகள் பார் !
தேடு கின்ற கண்கள் பார் !
     தெரியும் இயற்கைக் காட்சி பார் !

வலையைப் பின்னும் சிலந்தி பார் !
     வாலைக் குழைக்கும் நாயைப் பார் !
தலையை ஆட்டும் ஓணான் பார் !
     தாவி ஆடும் குரங்கைப் பார் !
அலையுங் கொடியில் அரணை பார் !
     அமைதி காக்கும் கொக்கு பார் !
நிலையி லாத உலகைப் பார் !
     நீளும் இயற்கைக் காட்சி பார் !

ஆட்டம் போடும் அருவி பார் !
     அலைந்து திரியும் ஆற்றைப் பார் !
கூட்டம் கூடும் மீன்கள் பார் !
     கொத்திக் கவ்வும் கழுகு பார் !
நோட்டம் பார்க்கும் கருடன் பார் !
     நுங்கு தொங்கும் பனையைப் பார் !
காட்டும் புவியின் எழிலைப் பார் !
     களித்துச் சுவைத்து நல்லா பார் !

                                                                -இராதே

தாய்மொழிக் கல்வி - காவடிச் சிந்து

ஆங்கில மேமொழி ஆளுமை யாமென
          ஆவலில் சிக்குவ தோ ? - செந்தேன்
     அன்னைத்த மிழ்மொழி தன்னைய றியாமல்
          அச்சத்தில் விக்குவ தோ ?

ஓங்கிய வாணிகம் மேம்படும் மாமொழி
          ஊடாக வீண்பேச் சு ! - தமிழ்
     ஒட்டார மாகவே விட்டுப்ப டிக்காத
          ஊக்கம்எங் கேபோச் சு !

தாய்மொழிக் கல்வியைத் தள்ளுகி றாய்நனி
          தப்பெனத் தோணலை யோ ? - மொழி
     தண்டமிழ் நாட்டிலே தன்னுணர் வில்லாமல்
          சாலவே பேணலை யோ ?

வாய்மொழி ஆங்கிலம் மாபெரும் தேனென
          மண்ணதி லெண்ணுவ தேன் ? - வளம்
     மண்டிய தாய்மொழிக் கல்வியைக் கற்காமல்
          மாயத்தில் மின்னுவ தேன் ?

சர்க்கரைக் கட்டியாம் தண்டமிழ்ச் செம்மொழி
          தாய்த்தமிழ் எள்ளுவ தோ ? - மொழி
     சந்தையில் சிந்திடும் ஆங்கில வன்மொழி
          தாளத்தில் துள்ளுவ தோ ?

அக்கரைக் காரர்கள் ஆண்டதே அம்மொழி
          அத்தோடே போயாச் சே ! - அதை
     அப்படி யேநாளும் ஆறத்த ழுவுதல்
          ஆணவப் பேய்மூச் சே !

நம்புவி மேலுறும் நற்றமிழ் மீதினில்
          நம்பிக்கை ஏனிலை யோ ? - ஆண்ட
     நம்மவர் தென்மொழி நாளுமே வாழ்ந்திட
          நற்செயல் தானிலை யோ !

அம்புவி மேவிடும் அன்பரே நண்பரே
          ஆதித்த மிழ்மீட் போம் ! - மாளும்
     அன்னைத்த மிழ்ஆள எல்லோரும் ஒன்றாகி
          ஆண்டத்த மிழ்க்காப் போம் !


                                                                         - இராதே

நத்தை ! வித்தை ! தத்தை !


நத்தை நத்தை நத்தை
     நகர்ந்தே ஊறும் பூச்சி நத்தை !
மெத்தை மெத்தை மெத்தை
     மேனி மெல்ல தாங்கும் மெத்தை !
சொத்தை சொத்தை சொத்தை
     சொல்லும் பல்லைத் துளைக்கும் சொத்தை !
பத்தை பத்தை பத்தை
    பழத்தை அறிந்து பிரித்தால் பத்தை !


வித்தை வித்தை வித்தை
    விரும்பும் கலைகள் கற்றல் வித்தை !
அத்தை அத்தை அத்தை
    அம்மான் மனைவி அவளே அத்தை !
கத்தை கத்தை கத்தை
    கட்டுக் கட்டாய் பணமோ கத்தை !
ஒத்தை ஒத்தை ஒத்தை
    ஒன்றே ஒன்றாய் இருத்தல் ஒத்தை !


செத்தை செத்தை செத்தை
    சேரும் குப்பைக் கூளஞ் செத்தை !
மொத்தை மொத்தை மொத்தை
    மொழுகும் தூவல் முள்ளால் மொத்தை !
பொத்தை பொத்தை பொத்தை
    பூசணிப் போல உடம்பே பொத்தை !
தத்தை தத்தை தத்தை
    தாவித் திரியும் கிளியே தத்தை !

                                                                   - இராதே

திங்கள், 17 செப்டம்பர், 2018

ஊருக்கு நல்லது சொல்வோம் !

ஊருக்கு நல்லது சொல்வோம் !

என்னசொல்வ தென்னவென்றே
என்மனத்தை நாடினேன் ;
சொன்னசொற்கள் சோரமாக
சொல்லவார்த்தை தேடினேன் ;
கண்ணவிந்து போனபின்பு
காணஒவி யங்களோ ?
பின்னரென்ன பேசிப்பேசிப்
பிழைக்கவா புவியிலே ?

உண்ணுகின்ற வாய்த்திறந்தே
உண்மைகள் பிறக்குமா ?
தின்னுமிந்த வாய்விடுக்கும்
திணித்தெழுந்த பொய்யுரை ;
கன்னமிட்டுக் கருவறுக்கும்
கயவரெண்ணம் மேலெழும்
சொன்னசொல்லும் ஏற்குமா ?
சுமைசுமந்து நிற்குமா ?

தன்னலந்த ழைத்தெழுந்தே
தற்பெருமை மேவியே
தன்னைமுன் னிலைப்படுத்தித்
தமிழழித் தொழிக்கிறார் !
என்னவென்றே சொல்லுவேன்
எரியுமாண வத்தினை !
பின்னரென்ன சொல்லிச்சொல்லிப்
பிழைக்கவா புவியிலே ?

பொன்னுமணியும் பொருளும்புகழும்
பொற்பதக்க விருதுமே
எண்ணியெண்ணித் தமிழைவிற்றே
எடைக்கெடை ஈடேற்றுறார் !
இன்னல்செயும் இவரையெண்ணி
இன்னுமிங்குச் சிந்தனை
பின்னரென்ன கூறிக்கூறிப்
பிழைக்கவா புவியிலே ?

பெண்மைமேன்மை பேசிப்பேசிப்
பெருந்தகைபோல் நடிக்கிறார் ;
பெண்விளம்ப ரப்படுத்திப்
பெரியகாசும் பார்க்கிறார் ;
இன்பபோகப் பொருளுமாக்கி
இனியபோதை கொள்கிறார் ;
பின்னரென்ன பேசிப்பேசிப்
பிழைக்கவா புவியிலே ?

நண்பரென்றே புன்னகைத்தே
நாடகங்க ளாடுறார் ;
நண்பர்வீழ நஞ்சையூட்டி
நரித்தனத்தை வெல்கிறார் ;
பண்பிலார் பழக்கமெண்ணிப்
பாடியாடி என்பயன் ?
பின்னரென்ன பேசிப்பேசிப்
பிழைக்கவா புவியிலே ?

உண்மையான நன்மைதன்னை
ஊருக்கே உரைக்கனும் ;
உண்மைகண்டு வாயைமூடி
ஊமைபோல் விழிப்பதேன் ?
உண்மைசொல்லி உண்மைசொல்லி
ஊரின்நன்மை கொள்ளுங்கள் !
நன்மைநன்மை நன்மைநல்கி
நன்குவாழ்ந்து வெல்லுங்கள் !

                      -இராதே

சனி, 15 செப்டம்பர், 2018

பென்குயின்



அப்பிவாய் அழகுக் குள்ளன் ;
     ஆடியே அசைந்துச் செல்வான் ;
செப்பிடும் துள்ளல் ஓசை ;
     செல்வதைக் காண ஆசை ;
வெப்பத்தை உடலில் ஏற்பான் ;
     வெண்பனி குளிரில் துய்ப்பான் ;
உப்பிய சிறகி னுள்ளே
     உலாவிடும் காற்றால் மிதப்பான் !

தன்னின முட்டை அவையம்
     தயங்காது தானே காப்பான் ;
நன்னீரைக் குடிக்க மாட்டான் ;
     நன்னீரில் வாழ மாட்டான் ;
தன்னிணைச் சேர வேண்டித்
     தனியிசைப் பாடி அழைப்பான் ;
பென்குயின் குறும்பு நடையான் ;
     பெரும்பனித் துருவம் வாழ்வோன் !

மீன்களை உணவாய்க் கொள்வான் ;
     வெகுநாட்கள் நீந்தி மகிழ்வான் ;
வான்தாவிப் பறக்க மாட்டான்
     வகைமையோ பறவை இனந்தான் ;
நாண்விடும் அம்பு போல
     நடுகடல் துள்ளி மீள்வான் ;
கூன்வளை நீண்ட அலகால்
     குதித்தோடும் மீன்கள் தின்பான் !

செவித்திறன் சிறப்பி னாலே
     செம்மையாய்க் களங்கள் காண்பான் ;
குவிந்திடும் கீழப் பார்வை
     கூர்மையால் இரைகள் கொள்வான் ;
புவிதொடும் வயிறோ வெண்மை ;
     புறமுதுகு முழுதும் கறுமை ;
அவிழ்ந்தோடும் முட்டை போல
     அடிவயிற்றால் வழுக்கிச் செல்வான் !

                                                                   
- இராதே

வெள்ளி, 14 செப்டம்பர், 2018

மரவட்டை




வட்ட வட்ட வளையங்கள்
     வனைந்த உருளை மரவட்டை ;
தொட்ட உடனே சுருண்டிடும்
     துப்பும் பீச்சும் நச்சினை ;
நெட்டை உணர்வுக் கொம்புகள்
     நிலைமை அறிய உதவிடும் !

பத்து நூறு கால்களில்
     பதமாய் ஊறும் மரவட்டை ;
மெத்து மெத்தாம் இலைகளை
     மென்றுத் தின்னும் மரவட்டை ;
சத்து சத்தாய் உரங்களைச்
     சால தருமே மரவட்டை ;
கத்தை கூரை விழலிலே
     காணப் படுமே மரவட்டை !

ஈர மான சூழலில்
     இயங்கும் உயிரி மரவட்டை ;
ஆர மாக சுருளுமே
     ' அழுக லுண்ணி' மரவட்டை ;
சாரை சாரை யாகவும்
     சந்து பொந்தில் ஊர்ந்திடும் ;
கூரை சன்னல் தரைகளில்
     கூடி வாழும் மரவட்டை !
                                                      - இராதே

வவ்வால்


வானம் பார்த்துத் தலைக்கீழாய்
     வசமாய்த் தொங்கிப் பகல்போக்கும்;
காணும் பார்வை குறைவினால்
     கடக்கக் கேளா மீயொலியைப்
பேணும் நுட்பம் கைக்கொண்டே
     பேரு லகெங்கும் சுற்றிவரும் ;
ஊணும் கொள்ளும் வாய்வழியே
     உரமாய் மாற்றி தரும்வெளியே !

பறவை இனத்தில் 'பாலூட்டி'
     பழங்கள் உண்ணும் 'பழந்தின்னி'
நிறத்தில் சிவப்பு பழுப்புண்டு ;
     நெடிய இரவின் 'கைச்சிறகி'
உறவாம் குட்டியை அரவணைக்கும் ;
     உறிஞ்சி மலர்த்தேன் குடித்துய்யும் ;
பறந்து பயிர்கள் மேய்வதினால்
     பாரில் வேளாண் எதிரியிது !

மருந்து செய்ய இவ்வினத்தை
     மாய்த்தே பணத்தைப் பார்க்கின்றார் ;
விருந்து படைக்க வாவலினை
     வேட்டை யாடி அழிக்கின்றார் ;
இருந்து வாழும் வசிப்பிடங்கள்
     இல்லா நிலைகள் தொடர்வதினால்
திரும்ப வவ்வால் கிடைத்திடுமோ ?
     திண்டா டிடுமே இவ்வுலகம் !

சுற்றுச் சூழல் காக்கவிதை
     துப்பும் வாவல் வழியெங்கும் ;
பற்றும் மலரின் மகரந்தப்
     பரல்கள் கடத்தி வனம்வளர
முற்றும் உதவும் வவ்வால்கள்
     முகமோ நரிபோல் குவிந்திருக்கும் ;
இற்றே வவ்வால் வீழாமல்
     இனத்தை மீட்போம் வாருங்கள் !

                                                               - இராதே

வியாழன், 13 செப்டம்பர், 2018

தட்டு


தட்டு வெள்ளி தட்டு
தட்டு வடிவம் வட்டு
தட்டில் தாளம் இட்டு
தட்ட வருமே மெட்டு
கிட்டு கையில் தட்டு
தட்டு நிறைய புட்டு
நாக்கில் சப்புக் கொட்டு
இட்டம் போல வெட்டு
-இராதே

சட்டை


கட்டம் போட்ட சட்டை
கறுப்புப் புள்ளிச் சட்டை
பட்டுத் துணியில் சட்டை
பருத்தித் துணியில் சட்டை
பொட்டுச் சிவப்பு சட்டை
புதிய நீலச் சட்டை
எட்டுச் சோடி சட்டை
எனக்கு நிறைய சட்டை
- இராதே

ஞாயிறு, 9 செப்டம்பர், 2018

நாவற்பழம்



பள்ளிக் கூட வாயிலில்
     பசுமை ஆலின் இலைகளில்
அள்ளி கூறு கட்டிய
     அதிகம் விற்ற பழமிதே ;
வெள்ளை உப்பைத் தூவியே
     விரும்பி உண்ட பழமிது ;
கொள்ளை சுவையைத் தந்திடும்
     கொழிக்கும் சத்து நிறைந்தது !

உண்ண உவர்ந்தே இனித்திடும்
     உமிழ்நீர் பெருகிச் செரித்திடும் ;
கண்ணீர் எரிச்சல் போக்கிடும் ;
     கரையும் சிறுநீர் கற்களும் ;
எண்ண ஆற்றல் வளர்த்திடும் ;
     எளிதில் கருப்பைக் காத்திடும் ;
சுண்ண இரும்புச் சத்துகள்
     சூழ விளையும் நாவலாம் !

உடலின் சூடு தணித்திடும் ;
     உறுநோய்ப் புற்றை எதிர்த்திடும் ;
குடற்புண் மறைய உழைத்திடும் ;
     குருதி சோகை தீர்த்திடும் ;
கடமை யோடு கல்லீரல்
     காக்கும் கரிய நாவலாம் ;
தடைகள் இன்றி உண்ணலாம்
     தளர்வு நீங்கி மகிழலாம் !

அவ்வை கேட்ட கனியிதாம் ;
     அருமை குணங்கள் உடையதாம் ;
கொவ்வை வாயின் நாற்றத்தைக்
     குறைத்துத் தூய்மை செய்திடும் ;
கவ்வும் இழிவு நீர்நோயைக்
     களைந்து உடலைப் போற்றிடும் ;
தவ்வி உலுக்கிப் பொறுக்கியே
     சலிப்புத் தீர திங்கலாம் !

கரிய நீல நிறமுடை
     கரைகள் படரும் நாவிலே ;
அரிய வளங்கள் இருப்பினும்
     அளவி னோடே உண்ணவும் ;
பெரிய அளவில் உண்பதால்
     பேச்சும் கட்டும் தொண்டையில் ;
உரிய கால பருவத்தில்
     உண்டு நலமே சேர்க்கலாம் !

                                               - இராதே

வெள்ளி, 19 ஜனவரி, 2018

வெறுமை

அடிவானத்தை
வருடியபடியே
மேல்நோக்கிப் படரும்
பார்வை
நிலவொளியின்
பொழிதலில்
மூழ்கித் தவிக்கும்
நினைவுகள்
உருண்டு வந்து
உலர்க்கோடுகளாய்க்
கண்ணீர்ப் பயணத்தின்
பாதை
உதடுகள் நனைத்த
கரித்த உவர்ப்புச்
சுவை
ஆரவாரமும்
அசைவுமின்றி
கவனித்தபடி
தன் இருத்தலைப்
பதிகிறது
வெறுமை
- இராதே

நாட்காட்டி

காற்றின் இருத்தலைத்
தாளின் அசைவுகளால்
உறுதிப்படுத்திக் கொண்டிருந்தது
ஒவ்வொரு நாள்
கிழிபடும்போது
365 முறை
உணர்த்தப்படுகின்ற
மரணங்கள்
கிழிவதினால்
தேய்கிறதா ? வளர்கிறதா ?
நுழைய வைக்கும்
பட்டிமன்றத் தலைப்பு
ஒவ்வொரு கிழிதலிலும்
ஒரு நாளை வளர்த்துதான்
போகிறது
ஒவ்வொரு தேய்தலிலும்
ஒரு பட்டறிவை
விட்டுத்தானே செல்கிறது
இளைத்து வந்தாலும்
நினைவுகளைத் தொகுத்துதானே
வருகிறது ?
சிலருக்கு அது படம்
சிலருக்கு அது பாடம்
கிழிபட்டு உதிர்ந்தாலும்
ஆண்டொன்றைப்
பெருமையோடுக்
காட்டி மாய்கிறது
நாட்காட்டி
- இராதே

சினம்

என்னைத் தெரிந்தவர்களுக்கு
நான் கோபக்காரன்
ஆனால் பாருங்கள்
யாரும் அச்சப்படுவதில்லை
என்னை அறிந்தவர்கள்
எப்போது கோபப்படுவேன்
என்ற தேர்வு வென்று
கைத்தேர்ந்தவர்களாகி
விட்டனர்
கோபந்தானே எனக்கு
பலமின்மை
அவர்களுக்கு
பலம்
இயலாமை புலப்படும்
கோபத்தைப் புரிந்த
தந்தரசாலிகள்
சாதிக்கின்றனர்
எப்போது அறுபடும்
இந்த கோபம் ?
உடன்பிறந்ததாயிற்றே
விடுமா உடனே ?
குணத்தையுமா
விடச் சொல்கிறீர் ?
குணம் வேண்டின்
கோபம் இருந்து விட்டுப்
போகட்டுமே
- இராதே

நியாத்தை யாரிடம் சொல்ல ?

உண்மையைச் சொன்னால் உதைப்பார்களே
பொய்யோடே பழகியவர்கள்
பூட்டிவைத்துப் பூட்டிவைத்துப்
புழுத்துபோன உண்மைகள்
நிகழ்காலத்தில் செல்லாதாகிக்
கடந்தகாலத்துப் பெருமைகளாய்
வலம் வருகின்றன
உயரே உயரே பறந்தாலும்
ஊர்க்குருவிதானே பொய்
உண்மைதானே பருந்து
மழை பொய்க்கிறது ஆனாலும் பெய்கிறது
ஆருடம் பொய்க்கிறது ஆனாலும் பலிக்கிறது
இவைகள் பொய் தரும் நம்பிக்கை
அடுத்தவன் உழைப்பைச் சுரண்டுவோம்
ஆனாலும் பொதுமை பேசுவோம்
அடுத்தவன் பணத்தில் குடிப்போம்
ஆனாலும் மதுவை ஒழிப்போம்
உண்மை தரும் நம்பிக்கையின்மை
போலிக்குப் போலியானதாய்
உண்மைக்கும் உண்மை உறைந்துகிடக்கிறது
நியாயத்தை யாரிடம் சொல்ல ?
- இராதே

ஒணான்

தென்னங்குச்சி
சுருக்கில் பிடிபட்டுத்
தொங்குகிறது
கல்லடிப் பட்டுத்
துடிதுடிக்கும்
ஓணான்
ஏசுவுக்கு
கொட்டாங்குச்சியில்
...நீர்க் கொடுத்ததாம்
அல்லாவை
தலையாட்டிக்
காட்டிக் கொடுத்ததாம்
மனத்தில்
சொல்லடிப் பட்டு
வளர்கிறது
மழலைப் பருவம்
                                   
- இராதே

புதன், 10 ஜனவரி, 2018

காக்கா முட்டை

மழையில்
அம்மணமாய்க் குளிக்கும்
மரங்கள்
காற்றின்
தலைத் துவட்டலில்
சிந்திச் சிதறும்
துளிகள்
கிளைத் தவழும்
கூட்டிலிருந்து
விழுமா முட்டை ?
கவலையில்
கரைகிறது
காகம்
- இராதே

கோலங்கள்

நீர்த் தெளித்துக்
கூட்டித் தள்ளி
அழகு ஊறக்
காத்திருந்து
புள்ளிகளால்
முத்தம் பெற்று
வளைந்து நெளிந்த
கோடுகளால்
வெட்கப்பட்டு
மார்கழி பூச்சூடும்
வாசலிலே
கால்பட்டு
அழிகின்றன
கோலங்கள்
                                       
- இராதே

சொல்

தேடிக் கொண்டிருந்தேன்
யாரோ இட்டது
எடுத்தேன்
சுற்றும் பார்த்தேன்
பயன்படுத்தினேன்
காக்கை இட்ட
எச்சந்தானே
நாம் உண்ணும்
பழங்கள்
விதை சொல்
எடுத்தாளுகையில்
கருத்தடிப் பட்டு
சாகாமலிருப்பின்
கவிதை

                                           -
இராதே

பரண்

சிலந்தி நெய்த கூரையில்
தூசிப் போர்வைக்குள்
துயின்றிருந்தன
சுவடிகள்
தும்மலுக்குக்
கம்பளம் விரிக்கும்
பழைமை நெடி
நாசி புகுதலில்
கிளர்ந்தெழும்
ஓசைகள்
எலி கொறித்த
பக்கங்களில்
தேடினேன்
காணவில்லை
கவிதை வரிகள்
                                             - இராதே

தொப்பை

இரைப்பும்
பெருமூச்சும்
ஏந்திச் சுமக்கும்
பெருஞ் சுமை
கடற்கரை
நடைபயிலலி்ல்
நகை படும்
காட்சிப் பொருள்
நித்தம் நித்தம்
உருட்டி மிரட்டிச்
சுரண்டியதில்
வாரிகட்டிக் கொண்ட
வயிற்றுப் பானை
யாருடைய உழைப்பில்
வளர்ந்திருக்கிறது
இந்த கொழுப்பு ?
கரையுமா
கண்ணீத் துளிகளுடன்
கனக்கிறது
தொப்பை ?

                                   
- இராதே

ஞாயிறு, 7 ஜனவரி, 2018

பைத்தியம்

கடலலைகளின் சிரிப்பு
கரைகளில் நுரைக்கிறது !
மழைத்துளிகளின் சிரிப்பு
தெறிப்பினில் சிலிர்க்கிறது !
மலைகளின் சிரிப்பு
அருவியில் வழிகிறது !
தென்றலின் சிரிப்பு
தழுவலில் மிளிர்கிறது !
மலர்களின் சிரிப்பு
மணங்களில் கமழ்கிறது !
தனிமையில் ...
கவிஞனின் சிரிப்பு
பைத்தியமாகிறது ?

மௌனம்

எப்படித் தான் வெளியே
செல்வது ?
ஒன்றோடு ஒன்றுக்கூடி
குழப்பத்தில்
முணுமுணுத்தன
சொற்கள்
ஏன் இப்படி
நடந்து கொள்ளகின்றன
உதடுகள் ?
திடீர்
வேலை நிறுத்தத்தால்
கூடுதல் பணிச்சுமை வருமே
கதிகலங்கிப் போயிருந்தன
விழிகள்
ஓசைகளும் அசைவுகளும்
சிக்கலுக்குத் தீர்வுக் காண
வாயிடம் முறையீடு
செய்து கொண்டிருந்தன
பேச்சற்றச் சூழலில்
இவற்றையெல்லாம்
பொறுமையாக
வேடிக்கை பார்த்தது
மௌனம்
- இராதே

சனி, 6 ஜனவரி, 2018

இரவு

சீக்கிரம் தூங்கேன்
கண்களிடம்
கெஞ்சிக் கொண்டிருந்தது
கனவு
புரண்டுப் புரண்டுப்
படுக்கைக்கு உடம்புப்
பிடித்து விட்டது
உடல்
போர்வையை விலக்கலும் அணிதலுமாய்ச்
செய்வித்தது
குளிர்
கவலைகள் மட்டும்
கொட்டக் கொட்ட
விழித்திருந்தன
கொட்டாவிச்
சத்தத்தைச ரசித்தபடி
இரவு
- இராதே

புழு

இலைகளைக் கடித்து
உண்டபடி
ஊர்ந்துகொண்டிருந்தது
பணமதிப்பிழப்பால்
வங்கி வாசலில்
தவங்கிடக்க வில்லை
GST வரி செலுத்த வேண்டுமெனப்
புலம்பிப் புலம்பி
அழவுமில்லை
மாட்டிறைச்சி உண்டால்
மரணிப்போம் என்ற
அச்சமுமில்லை
கருப்புப் பணபங்கு
வங்கிக் கணக்கில்
விழுமா ? விழாதா ?
கவலையுமில்லை
அமைதியாக
இலைகள் தேடி
ஊர்ந்துகொண்டே
பயணித்தது புழு
- இராதே

வெள்ளி, 5 ஜனவரி, 2018

துளிப்பா - 53

காலடி தீண்டியதில்
முணுமுணுக்கும்
சருகுகள்



வெற்றிபடி ஏற
கைப்பிடித்துசெல்கிறது
தோல்வி



முத்தத்தில்
முணுங்குகிறது
புல்லாங்குழல்



கல்லடிபடுகிறது குளம்
சில்லுசில்லாய்
நிலா



கிச்சுகிச்சு மூட்டும் தென்றல்
நெளிகிறது
கொடி


                                                                        - இராதே