உதட்டினில் வெல்லம் வைத்தே
ஊர்கூட்ட நினைப்பா ரடா - தோழா
உண்மைகள் மறைப்பா ரடா !
வள்ளுவன் பெயரைச் சொல்லி
வாய்கூச பொய்கள் சொல்லி
வலைகளை விரிப்பா ரடா - தோழா
வஞ்சக நெஞ்ச ரடா !
கொள்கைமான் காந்தி யாரைக்
கொன்றவன் கோட்சே வுக்குக்
கொடிகட்டி மகிழ்வா ரடா - தோழா
கொலைவெறிக் கூட்ட மடா !
முள்மன வேலி யிட்டு
முடக்கிடும் மடமை பேணி
முரண்பகை வளர்ப்பா ரடா - தோழா
மூட்டித்தீக் காய்வா ரடா !
மக்களைத் தூண்டி விட்டு
மதவாதம் நாளும் பேசி
மகிழ்வினில் திளைப்பா ரடா - தோழா
மதவெறி அரக்க ரடா !
வக்கனை கூத்தும் ஆடி
வகைவகை கதைகள் கூறி
வாக்குகள் சேர்ப்பா ரடா - தோழா
வழிப்பறி கும்ப லடா !
முக்கண்ணன் மாதோர் பாகன்
முழுக்கதை குறைகள் கூறி
முடக்கினர் எழுத்தை யடா - தோழா
மௌடிக கூட்ட மடா !
எக்காள மிடுவோர் தம்மை
எதிர்த்திட ஒன்றாய்க் கூடி
இயங்கிட தோள்கொ டடா - தோழா
எதிரியை நேர்கொள் ளடா !
-இராதே
கருத்துகள் இல்லை:
கருத்துரையிடுக