கம்மாக்கரை
உரசுங் காத்தும் உரசுது
ஊதைக் குளிரும் உலர்த்துது
சரச மாட அழைக்குது
சடுகுடு தானே ஆடுது !
அரசல் புரசல் ஆளைய்யா
அசரும் போது வாறியே
பரிசம் முதலில் போடட்டும்
பார்வை அப்புறம் மீறட்டும் !
ஒன்னும் மண்ணா இருக்கிறோம்
உசிரில் ஒன்னாக் கலக்கிறோம்
இன்னா இப்படி முறைக்கிற
இதுக்கு ஏனோ பதைக்கிற !
சும்மா சும்மா இளிக்கிற
சுருக்குப் போட்டே இழுக்கிற
பம்மி பம்மி நெளியிற
பரவசத்திலே மிதக்கிற !
கம்மாக் கரையும் அழைக்குதே
கெண்டையுங் கெளுத்தியுந் துள்ளுதே
இப்போ நீயும் வரலனா
எப்போ நானும் பார்ப்பது ?
கல்யாணந் தான் நடக்கட்டும்
கையைக் கோர்த்துத் திரியலாம்
மெய்யா லுந்தான் சொல்லுறன்
மொத்தக் கதையும் முடிக்கலாம் !
- பொறிஞர் இராதே