கஜல் - 8
நான்பூந் தென்றல் ! கதவுகள் ஏனோ அடைக்கிறாய் ?
நான்குளிர் வாடை ! கம்பளிக்குள் ஏன் நுழைகிறாய் ?
நான்விழி வெண்படலம் ! கண்களை ஏனோ மூடுகிறாய் ?
நான்குருதிப் புனல் ! சினத்தில் ஏன்தான் முறைக்கிறாய் ?
நான்உன் உள்ளே ! வெளியே துரத்த முடியாது !
நான்உயிர்த் துடிப்பு ! மூச்சை நிறுத்த முடியாது !
நான்உன் உணர்வு ! நினைவைத் துறக்க முடியாது !
நான்உன் உலகம் ! காதல் நெகிழ்வுகள் மடியாது !
- இராதே
கஜல் - 7
'துறுதுறு' கண்களால் துழாவி நிற்பாயே !
துடிக்கும் நெஞ்சை மிரட்டவா ? உருட்டவா ?
'விறுவிறு' பார்வையை விலக்கி வைப்பாயே !
விஞ்சிடுங் காதலை மறைக்கவா ? மறக்கவா ?
கனவுகள் உண்ணும் கண்களில் வாளேன் ?
காதல் உணர்வை நறுக்கவா ? திறக்கவா ?
நினைவுகள் தூண்டும் நீண்டிடும் நாளேன் ?
நின்னுணர் ஏந்த மறுக்கவா ? சுமக்கவா ?
- இராதே
மயக்கத்தில் நானிருந்தேன் மல்லிகையாய் மணக்கின்றாய் !
தயக்கத்தில் நானிருந்தேன் தள்ளிநின்றுச் சிரிக்கின்றாய் !
வியப்புடனே நானிருந்தேன் வீதியோடி மறைகின்றாய் !
விளங்காமல் நானிருந்தேன் விடைகாண அழைக்கின்றாய் !
மழுங்கா உணர்வெடுத்து மஞ்சத்தில் சேர்த்துவிடு !
விழுங்கும் கடைபார்வை வித்தைகற்றுத் தந்துவிடு !
புழுங்கும் மனக்கதவைப் பூட்டாமல் திறந்துவிடு !
புரையோடும் மனப்புண்ணை புணுகாலே எழுதிவிடு !
- இராதே
காதலுறு நினைவுகளே கவிபுனைய வருவாயா ?
கட்டித்தேன் முத்தமதைக் கசிந்துருக தருவாயா ?
நினைவலைகள் நெஞ்சணையக் காதல்கரை தொடுவாயா ?
நிலாவிடுங் குளிர்க்கணையை எதிர்நின்றுத் தடுப்பாயா ?
வெண்பனியை விரல்கொண்டு வெய்யோனை மறைப்பாயா ? தனிமைநிலைப் பேணலிலே வெம்மைத்தீ அணைப்பாயா ?
விழியெழுதும் பார்வைமடல் விடுத்தகதை அறிவாயா ?
விழுந்தமனம் எழுந்துலவ வினைப்பயன் புரிவாயா ?
- இராதே
பனிப்பந்து துருவங்கள் கரைந்தால் என்ன ?
பவழத்தின் பாறைகள் தேய்ந்தால் என்ன ?
கனிகொத்துங் கிளிக்கூட்டம் குறைந்தால் என்ன ?
கவனருவி மாமலைகள் காய்ந்தால் என்ன ?
தேன்சிந்தும் உனதழகுச் சிரிப்போ மோதும்
தேவதையின் சிற்றிடையின் சிலிர்ப்பே போதும்
தேர்ந்தெழுந்த தேன்காதல் உணர்வே ஓதும்
தேயாத உள்ளூறும் நினைவே கோதும்
- இராதே
