தமிழ் வாழ்த்து
ஏடேந்தும் வெண்பாக்கள்
எழிலார்ந்த விருத்தங்கள்
எல்லாமும் சூடிவரு வாள்
இடையாடும் வஞ்சிப்பா
இதழூறும் சிந்துப்பா
இசைசேர ஆடிவரு வாள்
சூடேந்தும் கலிப்பாக்கள்
சுவையேந்தும் ஆசிரியம்
சுண்டிவிடும்
நொடியில்தரு வாள்
சுவையான சந்தங்கள்
சுகமேவும்
வண்ணங்கள்
சுரம்பாடி தேடித்தரு வாள்
ஈடேறும் எண்ணங்கள்
இயல்பான உணர்வோடு
எனையாளும் மொழியின் உமையே !
இதயத்தின் உள்ளூறும்
இனிதான பாவாக்கி
இமையத்தில் ஏற்றும் எமையே !
- இராதே
பாடிப்பாடி நம்மொழிப் பரவச்செய்தல் நம்பணி ;
ஓடிஓடி செம்மொழி ஒளிரச்செய்தல் நம்வழி ;
நாடிநாடி நம்தமிழ் நாளுமோங்க செய்வோமே ;
கோடிகோடி தமிழரின் கொள்கைகொள்கை கொள்கையே !
பேசுகின்றோம் பிறமொழி பேச்சிலில்லை தமிழ்மொழி ;
வீசுகின்ற சொல்லிலும் வியன்றமிழும் இல்லையே ;
பூசிப்பூசி மழுப்பியே பொற்றமிழை அழிக்கிறார் ;
கூசிக்கூசிக் கூனிகுறுகி கொள்கைவிடுதல் எங்ஙனம் ?
எழுத்திலில்லை எந்தமிழ் இளைஞர்நாவில் இல்லையே ;
பழுத்தமூத்த மொழியினைப் பாரிலழிக்க லாகுமோ ?
கொழுத்தபகை வர்வன்மத்தால் குன்றலாமோ எம்மொழி ?
அழுத்தங்கொடுத்தே மீண்டும்நாம் அன்னைத்தமிழை நாட்டுவோம் !
வழக்குரைக்கும் அறமன்ற வழக்கிலில்லை எம்தமிழ் ;
முழக்குகின்ற வெளியெல்லாம் முத்தமிழைக் காணோமே ;
சுழலுகின்ற புவியிலே சூழ்ச்சியின் பிடிக்குள்ளே
உழலச்செய்தே தமிழினை ஒழித்தழிக்கப் பார்க்கிறார் !
அன்னைத்தமிழ் வாழ்த்தினை அவமதித்தே அமர்கிறார் ;
அன்னைஆண்டாள் பெயரிலே அடாவடிகள் செய்கிறார் ;
மண்ணொழிந்த வடமொழி மறுபிறவி எடுத்திட
எண்ணும்ஈனத் துறவியர் எழுச்சித்தமிழை மிதிக்கிறார் !
தாய்தடுத்தி டினும்விடோம்; தமிழழிப்போ ரைவிடோம் ;
ஏய்த்தவீணர் எவரையும் எளிதில்வாழ விட்டிடோம் ;
பொய்க்கவைத்தே சூதினைப் பொடிப்பொடிக ளாக்கியே
தாய்த்தமிழே வாழ்வுற தருவோமெங்கள் உயிரையே !
- இராதே
வினைத் திட்பம்
கூடும் குழந்தையர்.jpg)
