இராதே

இராதே
eradevadassou

ஞாயிறு, 22 நவம்பர், 2026

 மாய ஊஞ்சல் !


மாய ஊஞ்சல் ஆசை கயிற்றில்

   மயங்கி ஆடுது !

பாயும் வேகம் பாயும் வீச்சில்

   பாடஞ் சொல்லுது !   ( மாய )


தேயும் ஒலிகள் உரசி உரசி

   செவிகள் கூசுது !

தேறும் மனமா ? ஆறும் மனமா ?

   தேடல் நீளுது !   ( மாய )


அவையம் காக்கும் மவுனமுட்டை

    கவலைப் பொரிக்குது ;

அசையும் வீச்சில் ஆடும்ஊசல்

   அமைதி கொல்லுது !

      பூவும் பொக்கும்;

      சொல்லும் தைக்கும் ;

      நினைவு மொய்க்குது - சேர்ந்த 

      நினைவு மொய்க்குது !    ( மாய ) - 1


கவையில் சிக்கிக் கலங்கும் மனசில்

   கறைகள் அரிக்குது ;

அடித்து அடித்து துவைக்கும் காலம்

   அழுக்கை நீக்குது !

      நாவும் திக்கும் ;

      யாவும் விக்கும் ;

      நினைவு மக்குது - சேர்ந்த

      நினைவு மக்குது !   ( மாய ) - 2


அசைவில் புரளும் வாழ்க்கைப் பொம்மை

   அடங்கத் துடிக்குது ;

ஆடும் ஊஞ்சல் மாய வீச்சை

   நிறுத்த மறுக்குது !

      ஊசல் நிக்கும் ;

      உயிரும் நிக்கும் ;

      நினைவு மக்குமா - வாழ்ந்த

      நினைவு மக்குமா ?   ( மாய ) - 3


- பொறிஞர் இராதே

 சொல்லால் சுடு !


நாக்கில கேடு ! வாக்கில சூடு !

நாலு நல்ல வார்த்தைப் போடு !

மனசில வாட்டம் ; முகத்துல காட்டும்

மலர்ந்தா வாசம் ; காத்துல வீசும்

முரண்டு முரண்டு வரும்

திரண்டு திரண்டு அழும்

குத்தமா ? மனம் சுத்தமா ?   ( நாக்கில )


புள்ளியில் சிக்குற கோலங்கள் விரியும் ;

சிக்கலும் அவிழ்ந்தா ஜாலங்கள் தெரியும் ;

பட்ட மரத்துல பசுந்தளிர் ஏது ?

பறக்கும் மனசுக்கு தடைகள்

செல்லாது !    ( நாக்கில ) - 1


யானைமிதியடி பானைகள் நொறுங்கும் ;

பூனைமிதியடி தரைக்கா வலிக்கும் ;

எல்லாக் குழப்பமும் கொதிப்பில் குழையும் ;

நல்லாத் தெளிய நியாயங்கள் வழியும் !     ( நாக்கில) - 2


நீரில காத்துல எழுதினா மறையும் ;

சொல்லாச் சுட்ட மனசையே குடையும் ;

சொல்லுற சொல்லுல பக்குவம் இருக்கு ;

தைக்கிற முள்ளுக்கு வலிதான் கணக்கு !     ( நாக்கில ) - 3


பொறிஞர் இராதே

 மனுசன் கதை உச்சமில்லை !


கரணம் தப்பினா

     வருவது மரணந்தான் ;

மரணம் தப்பினா

     மறுபடி ஜனனந்தான் !    ( கரணம் )


பட்ட மரந் துளிர்க்குமா ?

     பாழும்மனம் வெளுக்குமா ?

பட்டறிவு சொன்னக் கதை

     விட்டக் குறையாகுமா ?


விட்டக்குறைத் தொட்டக்குறைத்

     தேடி வந்து காலைசுத்தும் ;

செய்தவினை வினைவிளைஞ்சி

     அறுவடைக்குக் காத்துநிற்கும் !    ( கரணம் ) - 1


கண்ணிருந்தும் குருடுதான் ;

     காதிருந்தும் செவிடுதான் ;

இழுத்துவிடும் மூச்சினிலே

     பறப்பதிந்த உசுருதான் ! 


எட்டு சாண் உடம்பினிலே

     எக்கச்சக்க ஆசையடா ;

எட்டடி மண்ணுக்குத்தான்

     இந்த உடல் பூசையடா !    ( கரணம் ) - 2


ஊர்க்கூடிச் சுத்திநிற்கும்

     உறவெல்லாம் ஓலமிடும் ;

பேரைத் தூக்கி ஓரம்போட்டுப்

     பிணமுன்னுப் புதைச்சிடுவான் !


கொண்டு வந்தா யாரு இங்கே ?

     கொண்டு செல்ல ஏதுமில்லை ;

மண்ணுத் தின்னா மிச்சமில்லை ;

     மனுசன் கதை உச்சமில்லை !    ( கரணம் ) - 3


பொறிஞர் இராதே

தூமழை தூவுமம்மா

 தூமழை தூவுதம்மா !


வானந்தான் தூமழை தூவுமம்மா 

வானந்தான் தூமழை தூவுமம்மா

பொன்னான பூமிக்கு வானந்தான்

தூமழை தூவுமம்மா

மைவண்ண மான வானந்தான் 

தூமழை தூவுமம்மா ! 

 

வானந்தான் தூமழை தூவுமம்மா 

வானந்தான் தூமழை தூவுமம்மா

பொன்னான பூமிக்கு வானந்தான்

தூமழை தூவுமம்மா

மைவண்ண மான வானந்தான் 

தூமழை தூவுமம்மா ! 


முட்டிடும் இடிகளும் கட்டியம் படிக்க

கொட்டிடும் முகில்களும் கொட்டிடத் துடிக்க 

முட்டிடும் இடிகளும் கட்டியம் படிக்க

கொட்டிடும் முகில்களும் கொட்டிடத் துடிக்க 

சட்டென வருகையைத் தூறலாத் தெளிக்க

பட்டென பூமியும் மழையினில் குளிக்க   


வானந்தான் தூமழை தூவுமம்மா 

வானந்தான் தூமழை தூவுமம்மா

பொன்னான பூமிக்கு வானந்தான்

தூமழை தூவுமம்மா

மைவண்ண மான வானந்தான் 

தூமழை தூவுமம்மா ! 


பச்சை மரகத மரங்களும் ஈர்க்க

இச்சை இழைகளாய் நீர்த்துளி வார்க்க

பச்சை மரகத மரங்களும் ஈர்க்க

இச்சை இழைகளாய் நீர்த்துளி வார்க்க

மஞ்சை மயிலினம் தோகையை ஆர்க்க

மிஞ்சும் மண்மணம் வீசியே சேர்க்க


வானந்தான் தூமழை தூவுமம்மா 

வானந்தான் தூமழை தூவுமம்மா

பொன்னான பூமிக்கு வானந்தான்

தூமழை தூவுமம்மா

மைவண்ண மான வானந்தான் 

தூமழை தூவுமம்மா ! 


வெட்டிட மரங்களை மழைவளங் குறையும்

கட்டிய குளங்களில் நீர்வளம் சரியும்

வெட்டிட மரங்களை மழைவளங் குறையும்

கட்டிய குளங்களில் நீர்வளம் சரியும்

வெட்டுதல் தவிர்த்திட நாட்டுதல் செய்ய

கட்டிய குளங்களும் நீர்நிலை உய்ய  


வானந்தான் தூமழை தூவுமம்மா 

வானந்தான் தூமழை தூவுமம்மா

பொன்னான பூமிக்கு வானந்தான்

தூமழை தூவுமம்மா

மைவண்ண மான வானந்தான் 

தூமழை தூவுமம்மா ! 


    - பொறிஞர்

புதன், 18 நவம்பர், 2026

உலக நெகிழி மாசுபாடு


 

பனைமரம்

 



பனைமரமாம் பனைமரம்

பயன்கள் தரும் பனைமரம் ;

அனைவருக்கும் உதவிடும்

அருமைமரம் பனைமரம் !


வானைநோக்கி வளர்ந்திடும்

மண்வளத்தை உயர்த்திடும் ;

சேனைப்போல வரிசையாய்ச்

சேர்ந்து நிற்கும் பனைமரம் !


'நெட்டைப்புல்' தாவரம்

நிலத்தடிநீர்ச் சேர்த்திடும் ;

குட்டை, குளம், ஏரிகள்

கரையைக் காக்கும் பனைமரம் !


நுங்கு , பதனீர் , பனம்பழம்

திங்க நமக்குத் தந்திடும் ;

பங்குப் போட்டுத் திங்கலாம்

பனங்காய் வண்டி உருட்டலாம் !


ஓலைச்சுவடி விசிறிகள்

உவந்து வழங்கும் பனைமரம் ;

சாலையோரக் காவலாய்ச்

'சலாம்' சொல்லும் பனைமரம் !


தமிழகத்தின் மரமிதோ

தடங்களின்றி மறையுதே

அமிழ்தாய் அதனைக் காப்போம் !

அழிவிலிருந்து மீட்போம் !


       - பொறிஞர் இராதே

பாண்டா

 



கரடி பாண்டா கரடி

கரடி பாண்டா கரடி


கறுப்பும் வெளுப்பும் நிறங்கள்

கலந்த பாண்டா கரடி


குட்டை வாலை ஆட்டிக்

குலுங்கி மெதுவாய் நடக்கும்


மூங்கில் காடே வீடாம்

மூங்கில் அதற்கே உணவாம்


மூங்கில் உணவை அரைக்க

முழுதாய் வலிமை தாடைகள்


உண்ணும் இடத்தே உறங்கும்

உறங்கி எழுந்தும் உண்ணும்


உண்ணும் பத்து மணிநேரம்

உறங்கப் பத்து மணிநேரம்


உலாவும் மீதி மணிநேரம்

உருளும் நடையார் பாண்டா


ஆட்டைப் போலே கத்தும்

குட்டி நாய்ப்போல் அழுவும்


கலந்த குரல்கள் எழுப்பும்

கரடி உறுமலும் உறுமும்


மரத்தி லேறி மகிழும் 

மனம்போல் நீந்தி நெகிழும்


வாழ்ந்த புதைப்படி மங்களாய்

வாழும் பாண்டா கரடி


காடுகள் அழியக் கதறும்

காப்பின்றி பாண்டா பதறும்


காடுகள் காக்க முனைவீர்

கரடி பாண்டா காப்பீர் !


  - பொறிஞர் இராதே