இயற்கையோடு வாழ்வோம் !

        தவழ்ந்திடும்   காற்றின்   தூய்மை
                  தவணையில்   கெடுத்தோம்   மேலும்
        அவனியின்   அழகை   மாய்க்க
                  ஆலையின்   கழிவைச்   சேர்த்தோம்;
         பவனியாய்   ஊர்ந்த   ஆற்றைப்
                   பையவே   மடியச்   செய்தோம்;
         துவண்டிடும்   உலகைத்   தாங்கி
                    தூக்கிட   மறந்து   விட்டோம்!


         கடந்திடும்   வண்டி   உந்து
                     கரிப்புகை   உமிழ   விட்டோம்;
         அடர்ந்திடும்   காட்டை   வெட்டி
                      அடர்மழை   குறைத்து   விட்டோம்;
          படலமாம்   ஓசோன்   உள்ளே
                       பலப்பல   ஓட்டை    யிட்டோம்;
          தொடர்ந்திதைச்   செய்யச்  செய்ய
                       தொடருமே   தொல்லை   என்றும்


           பரிதியின்   கதிரின்   வெம்மை
                         பனிமலை   உருகச்   செய்யும்;
           எரிந்திடும்   பயிர்கள்   பச்சை
                          இயற்கையோ   எடுக்கும்   பிச்சை
            உரிந்திடும்   ஓசோன்   ஊடே
                           உரசிடப்   புகுமே   ஊதா
           அரித்திடும்   தோல்நோய்   எங்கும்
                           அடிக்கடி   வந்து   தீரும்!


           கரிவிடும்   வண்டி   ஓட்டம்
                          கடுமையாய்த்   தவிர்த்தல்   நன்றாம்;
           எரிந்திடும்   விளக்கின்   தன்மை
                          இயல்பினைக்   குறைத்தல்   காண்போம்;
            எரிச்சல்   விடுக்க   வைக்கும்
                          இளங்குளிர்   கருவி   ஆற்றல்
             உரியநல்   வழியில்   மாற்றி
                           ஒளிருவோம்   இயற்கை    யோடே   !
                                                                                                       -இராதே