சேலாப் பழம் (95) (செர்ரிப் பழம்)
சேலாப் பழமே செர்ரிப் பழமாம்
சேருந் தொற்றை அழிக்கும் பழமாம் ;
தோலால் விளையுஞ் சுருக்கம் போக்கித்
தோற்றம் இளமை கூட்டும் பழமாம் ;
கோலக் கண்ணின் பார்வை மங்கும்
குறைகள் நீங்க உதவும் பழமாம் ;
மாலைக் கண்நோய்த் தீர்க்கும் பழமாம்
மனத்தின் அழுத்தம் அகற்றும் பழமாம் !
உடலில் நரம்பின் இறுக்கம் தளர்த்தி
உறக்கம் கொடுக்கும் உயர்ந்த பழமாம் ;
குடலின் காணும் நோய்கள் விரட்டுங்
குணத்தை நல்கும் கோலிப் பழமாம் ;
உடலின் எடையை இறங்க வைக்கும்
உறையுங் குருதித் தடுத்துப் பெருக்கும் ;
அடங்கா நோயை எதிர்க்கும் ஆற்றல்
அளிக்கும் மருந்துப் பண்புப் பழமாம் !
புற்றின் அணுக்கள் வளர்ச்சி ஒடுக்கும்
புரட்டும் மலத்தின் சிக்கல் அறுக்கும் ;
பற்றும் பொடுகை ஒழித்துத் துரத்தும்
பசிக்கச் செரிக்கும் ஆற்றல் வளர்க்கும் ;
முற்றும் நரையைக் கருமை யாக்கும்
முடிகள் உதிர்வை முடக்கி நிறுத்தும் ;
சற்றும் சளைக்கா துழைக்கும் பழமாம்
சாலச் சிறந்த சேலாப் பழமாம் !
- இராதே
கருத்துகள் இல்லை:
கருத்துரையிடுக