இடை பத்து

(வெண்பா)

மெல்லிடையில் மெல்லமெல்ல மேய்ந்து விளையாடி

நல்லிடைதான் என்றெனுக்கு நன்காய்ந்து - சொல்வாயோ

என்றிருந்தேன் இன்றுவரை இல்லை விடைஒன்றும்

தென்றலே ஏன்தயக்கம் செப்பு (1)

உரலோ ? துடியோ ? ஒளிமின்னல் கீற்றோ ?

சரம்வீழ் மணற்கடிகை தானோ ? - உரசிடுந்

தென்றல் உலவித் திரியும் கொடிநாணோ ?

என்னென்பேன் உந்தன் இடை (2)

இடைதான் இருக்கிறதா ? இங்கே , மலைத்து

விடைதான் காணா வினாக்கள் - மடைபோல்

பொழிந்திடும் பாற்குடங்கள் பொல்லா எடையின்

செழிப்பால் இடைஉடையும் செப்பு (3)

முந்தானை ஏனுனக்கு முன்கோபம் மூடுகிறாய் ?

நந்திபோல் மறைத்து நாணுகிறாய் ! - முந்திவருந்

தென்றல் தருமுத்தம் தீண்டாதோ ? ஏக்கத்தில்

எண்ணி சிலிர்க்கும் இடுப்பு (4)

தென்றல் நகர்ந்தூரும் சிற்றெறும்புச் சென்றூரும்

குன்றா அழகூரும் கூன்பிறை - என்றே

முறுக்கி வளைந்தூரும் மென்விரல்கள் ஆள

இறுக்க இடரும் இடை (5)

சடையின் அசைவில் சரியும் உடையில்

நடையின் ஒழுங்கில் நடன - அடைவில்

கடைக்கண் அகல கவரும் மடிப்பின்

இடையில் உலவும் எழில் (6)

சுற்றுங் கொடியில் சுவைக்கும் இளநீர்கள்

இற்று விழுமோ ? இடிபடுமோ ? - பற்றியே

நின்றுளம் பந்தடிக்கும் நேர்த்தியினை என்னவென்றே

சின்ன இடைநீ செப்பு (7)

மாலைவருந் தென்றல் மயங்கி நுழைந்திட

சேலைத் தலைப்போ சிணுங்கும் - வேளை,

மடிப்பின் துடிப்பில் மனமோ கசங்க

நடிக்கும் இடையின் நகை (8)

வளைவில் வளையா மனதும் வழுக்கும்

கிளைவிடும் இன்பந் துளைக்கத் - திளைக்க

மலைக்க மலைக்க மதியும் மருள

இளைத்தே இழுக்கும் இடை (9)

சிக்கெனப் பற்றினேன் சிக்கனச் சிற்றிடைச்

சொக்கும் பொடியிட சொக்கவே - வைக்கும்

அழகை இடைபத்தாய் ஆக்கினேன் வெண்பா

இழைத்தேன் வடித்தேன் இடை (10)

-இராதே