கபடதாரி !
குள்ளமும் குறுக்கு வஞ்ச
குதர்க்கமும் பரத்தைப் பார்வை
வெள்ளமும் சிரிப்பும் நஞ்சும்
வெட்கமும் இல்லாப் பொய்யும்
தள்ளினும் அழுது காலைத்
தஞ்சமாய்ப் பற்றி சாய்க்கப்
பள்ளமும் வெட்டி நட்பைப்
பகடையாய் உருட்டும் கள்ளன் !
திடமிக்க ஊழல் குற்றம்
திசைதிருப்பி வழக்கை மாற்றி
படபடப்பு , பதட்டம் இன்றி
பணத்திலே குறியாய் நின்றே
உடனுறை வேலை யாளின்
உயிரினைப் பணயம் வைத்து
வடம்பிடித்து வாழும் கேடு
வாழ்வதன் மிச்ச எச்சம் !
பார்ப்போரைப் புகழ்ந்து வேசி
பணிவிடைகள் குழைந்தே ஆற்றி
ஆர்ப்பரிக்க காலை நக்கி
அடிமைபோல் ஏவல் செய்தே
சேர்ந்தாரை நம்ப வைத்தே
செருவாளால் கழுத்தை அறுத்தே
வேர்ப்பிடித்து விரியும் ஆசை
வேட்கையை வெல்லும் கபடன் !
- பொறிஞர் இராதே
கருத்துகள் இல்லை:
கருத்துரையிடுக