இயற்கை அழகு !

                                                         

                                                                                 

                                                         
                                    குலைகள்     சாய்ந்து    மண்ணில்    வாழை

                                                             குனிந்து     கவ்வ     இடம்பார்க்கும் ;

                                    தலைகள்     ஆட்டி     நீண்ட     தென்னை

                                                             தாள     மிட்டே     அசைந்தாடும் ;

                                    கிளைகள்     விரித்த     மரத்தின்     கைகள்

                                                           கீழே     ஆற்றில்     நனைந்தாடும் ;

                                   மலையின்     தென்றல்     உள்ளே     புகுந்து

                                                            மண்ணின்     வாசம்     பிடித்தோடும்  !     ( 1 )



                                    பந்தாய்     உருட்டிப்     பனங்காய்     நுங்கை

                                                            மந்திக்     கூட்டம்     மகிழ்ந்தாடும் ;

                                   சிந்தும்     நுங்கை     உண்ண     வந்த

                                                          சின்ன     முயல்கள்     ஒளிந்தாடும் ;

                                   முந்தி     ஓடும்     குட்டி     அணில்கள்

                                                         முட்டி     மோதி     இரைத்தேடும் ;

                                   அந்திப்     பரிதி     மேற்கில்     கவிழ்ந்து

                                                         அகலும்     காட்சிக்     களித்தாடும்  !           ( 2 )



                                   அன்ன     நிலவு     வருகை     பார்த்து

                                                         அல்லித்   தண்டு     வளைந்தாடும் ;

                                   சின்ன     வண்டு     சுற்றிச்     சுற்றித்

                                                         தேனை     ஊறிஞ்சி    நெகிழ்ந்தாடும் ;

                                   என்ன     அருமை    இயற்கை     பொழிவு

                                                         எந்தன்      நெஞ்சம்     குதித்தாடும் ;

                                  கண்ணைப்     போல     இயற்கை     காக்க

                                                          கனிந்து      மக்கள்      வரவேண்டும்  !        ( 3 )

                                                                                                                         -இராதே