குணக்கடலே ! -சப்பாணிப் பருவம்

                                 அன்னை     வடிவே     ஆருயிரே  !
                                                         அன்புத்     தவழும்     பேருருவே  !
                                               அமைதி     ஊற்றே     அருந்தவமே  !
                                                         அண்டம்     காக்கும்     அருட்சுடரே  !



                                 முன்னம்     பழுத்த     முதிர்ப்பழமே  !
                                                         முதன்மைச்     சேவை     பெட்டகமே  !
                                             முதியோர்     வாழ்வின்     ஒளிவிளக்கே  !
                                                          முரண்க     ளில்லா     முத்தொளியே  !



                                 கன்னம்     சிவக்கும்     சிரிப்பழகே  !
                                                       கருணை     மழையின்     கார்முகிலே  !
                                            காலம்     திணற     உழைத்தவரே  !
                                                       கனிவைச்     சுட்டும்     முகவரியே  !



                                 மின்னற்     கொடியே    மென்சிரிப்பே  !
                                                      மேன்மைத்     தொண்டின்     அருஞ்சுவையே  !
                                           மெழுகின்     ஈகை     குணக்கடலே  !
                                                     மேவியப்     பொறுமை     பெருமலையே  !



                                தன்னம்     பிக்கைக்     களஞ்சியமே  !
                                                    தட்டுக     தட்டுக     சப்பாணி  !
                                            தயவின்     பொருளே     தெரெசாவே
                                                    தட்டுக     தட்டுக     சப்பாணி  !

                                                                                                              - இராதே

சங்கு கழுத்து

                                                சந்தனமும்  சவ்வாதும்
                                                சண்டையிட்டுக்  கொண்டன
                                                மணப்பதில்
                                                யார்  உசத்தி ?
                                                அவள்  இருப்பதை
                                                மறந்துவிட்டீர்களே !
                                                சாந்தப்படுத்தியது
                                                காற்று !


                                              முகவரித்  தேடி
                                              அலைந்து  கொண்டிருந்தேன்
                                              காற்று
                                              கைப்பிடித்துச்  சென்று
                                              காட்டியது
                                              மொட்டை மாடியில்
                                              நீ  கூந்தல்
                                              உலர்த்திக்  கொண்டிருந்தாய் !


                                             காற்று
                                             உன்   கழுத்தில்  பட்டதும்
                                             அழகிய  ஓசையாய்
                                             மாறிற்று
                                             உனக்குத்  தான்
                                             சங்கு  கழுத்தாயிற்றே !

                                                                                           - இராதே

என் மனசு !

                                                    கைகளை
                                                    மணற்கடிகையாக்கி
                                                    காத்திருந்தேன்
                                                    கடற்கரையில்
                                                    அடிக்கடி
                                                    காலைத்   தொட்ட
                                                    அலைகள்
                                                    வந்து  விட்டாளா ?
                                                    எனக்  கேட்டுச்  சென்றது
                                                    மணித்துளிகளுக்கும்
                                                    நொடிப்  பொழுதுகளுக்கும்
                                                    அப்போது தான்
                                                    அர்த்தம்  தெரிந்து  கொண்டேன்
                                                    அடடா  என்ன  சுகம் !


                                                   கொட்டாங்குச்சியின்
                                                   ஆழத்தை
                                                   குச்சியால்  அளந்து
                                                   கண்டுகொண்டேன் ;
                                                   குளத்தின்  ஆழத்தை
                                                   மூச்சடைத்து  மூழ்கி
                                                   அறிந்துகொண்டேன் ;
                                                   உன்  மனசின்
                                                   ஆழத்தை
                                                   அளக்க  முடியாமல்
                                                   தோற்றுப்  போனேன் !


                                                  உன்  துப்பட்டாவில்
                                                  முடிச்சுப்  போட்டு
                                                  பின்னால்  விட்டிருக்கிறாய்
                                                  தொங்கிக்கொண்டிருக்கிறது
                                                  என்  மனசு  !

                                                                        - இராதே

அண்டத்திலே நீரைத்தேடி - இலாவணி

                 மானிடரே    பூவுலகில்    மண்ணைக்காக்கும்   மழைவளம்

                                    மாண்டிடும்பு    துக்கதைகள்    உண்டோ ?    உண்டோ ?

                வானிடைப்பொ    ழிந்துவரும்    காரிருள்மு    கில்களுமே

                                    வற்றிடவ    ருந்தும்நிலை    உண்டு !    உண்டு !

                ஏனிந்தஇ    ழிவுநிலை    எப்படிவந்    ததோஎன்றே

                                    யாவரும    றியுமாறே    சொல்லு !    சொல்லு !

                கானிடையி    ருந்தமரக்    கூட்டத்தைவெட்    டுவதாலே

                                    கண்டதுவே    இந்தத்துன்பம்    எள்ளு !    எள்ளு !

                தாண்டவமா    டிடும்பஞ்சம்    தண்ணீரில்லா    வாழுந்தேசம்

                                    தாரணியில்    வந்திடுமோ    மெய்யோ ?    மெய்யோ ?   

               ஆண்டிடும்நீ    ரையிறைத்தே    ஆணவத்தி    னாலழித்தால் 

                                    ஆண்டியாய்ப்போ     யிடும்தேசம்    மெய்யே !    மெய்யே !

               பாட்டன்பூட்டன்    வெட்டிவைத்த    ஏரிகுளம்    அத்தனையும்

                                     பட்டாப்போட்டு    மனையாக்கி    விற்றோம் !    விற்றோம் !

               கூட்டம்போட்டு    நீரைக்கேட்டுச்    சண்டையிடும்    துயரினைக்

                                     கொள்கையாக்கி    இன்றுநாமும்   பெற்றோம் !   பெற்றோம் !

              கொண்டதன்ன    லத்தினாலே    சேர்த்துவைத்த    நீரையெல்லாம்

                                     கொட்டிக்கொட்டி    வீணடித்துக்    கெட்டோம் !    கெட்டோம் !

              அண்டத்திலே    நீரைத்தேடி    ஆகாயத்தில்    நீரைத்தேடி

                                     அந்தரத்தில்    கோள்கள்பல    விட்டோம் !    விட்டோம் !

              வாழவரும்    சந்ததிக்குச்    சொத்துச்சுகத்    தோடுக்கூட

                                     வங்கிபோலத்    தண்ணீரினைச்    சேர்ப்போம் !    சேர்ப்போம் !

               பாழாப்போகும்    நீர்நிலைகள்    பாரிலேஉ     யிர்த்தெழவும் 

                                     பற்றுடனே    நாளுமதைக்    காப்போம் !    காப்போம் !

                                                                                                                                              - இராதே

             

புயலாய் . . .

           
                                      உன்   மீது  கொண்ட

                                      பொறாமையால்

                                      பொறுமையிழந்த

                                      தென்றல்

                                      மையம்  கொண்டுள்ளது

                                      வங்கக்  கடலில்

                                      புயலாய் . . .



                                      தாழ்வு  மனப்பான்மையில்

                                      தவிக்கிறது

                                      குறைந்த  காற்றழுத்த

                                      மண்டலமாய் . . .

                                      வெட்கத்தால்

                                      கரையேற  மறுத்து

                                      கண்ணீரை

                                      பொழிகிறது

                                      மழையாய் . . .

                                      நீ  சிரித்து

                                      சமாதானப்  படுத்தியதில்

                                      பலவீனமடைந்து

                                      மறைந்து  போகிறது  !

                                                                               - இராதே

வண்டிக்குதிரை

                                             சலனமற்ற
                                             இதழ்களின்
                                             சபிக்கப்பட்ட
                                             மௌனத்தை  மீறி
                                             சரிந்து  வழியும்
                                             முனகல்களாய்
                                             வார்த்தைகள்  !


                                            சொட்டும்  சோகத்தின்
                                            இடுக்குகளில்  நின்று
                                            ஒளிந்து  பார்க்கும்
                                            கவலைகள்  !


                                            சூரிய  ஒளியில்
                                            சூம்பிச்  சுருண்ட
                                            இலைகளாய்
                                            ஆதரவற்று
                                            வெறுமையாய்க்
                                            கிடக்கும்  மனசின்
                                            அடி  ஆழத்தில்
                                            ஆசைகள்  !


                                           எச்சில்  சோற்றை
                                           எட்டிப்  பறித்து
                                           எலும்புத்  துண்டைச்
                                           சிந்தையில்  உருட்டிச்
                                           சுவைக்கும்
                                           நாய்களாய்ப்
                                           பொறாமைகள்  !


                                          இவை  எதையும்
                                          காணாது
                                          சேணம் கட்டிய
                                          வண்டிக் குதிரையின்
                                          நொண்டி  ஓட்டமாய்
                                          ஓடிக்  கொண்டிருக்கிறது
                                          வாழ்க்கை  !

                                                                   - இராதே

கசடுகளில் . . .

                                                     விழிகளில்   திரட்டியக்
                                                     கண்ணீர்த்    திவலைகள்
                                                     உதடிறங்கி
                                                     உருளுகின்றன


                                                    உலர்ந்துபோன
                                                    உதடுகளில்
                                                    ஒழுகத்துடிக்கும்
                                                     புன்னகை
                                                     புரியாமல்
                                                     விழிக்கிறது


                                                   கட்டித்தழுவிக்
                                                   கட்டாரியால்
                                                   முதுகில்  பெற்ற
                                                    பரிசினால்
                                                    வழிகிறது
                                                    குருதி


                                                    துடிப்பை
                                                    இரட்டிப்பாக்கி
                                                    இதயம்  உயர்த்தும்
                                                    இரத்த  அழுத்தத்தில்
                                                    குழைந்து  வெறிக்கிறது
                                                    சுவாசமும்  பாசமும்


                                                    மேல்கீழாய்
                                                    இழுத்து  வாங்கும்
                                                    மூச்சுக்  காற்றின்
                                                    வெப்பம்
                                                    உயிரின்  வேருக்கு
                                                    வீசுகிறது
                                                    வெண் சாமரம்


                                                   நட்பை
                                                   நயாகராவாய்
                                                   முதலீடு  செய்து
                                                   நலன்களை  உறிஞ்சிய
                                                   நல்லவனே


                                                  துரோகக்  காளான்கள்
                                                  குடை  விரிக்க
                                                  பொழிகிற
                                                  கள்ள  மழையில்
                                                  இன்னும்
                                                  நனைகிறேன்


                                                  காலம்
                                                  காரித்துப்பியக்
                                                  கசடுகளில்
                                                  கலக்காமல்  சிரிக்கிறது
                                                  நட்பு !

                                                                   -இராதே

குறும்பா - 4

                           1. விழிப்புணர்வு                இல்லா ஆச்       சந்தை

                               விழிக்கொடையைத்   தரமறுப்போர்    மந்தை

                                               அழியுமுடல்       கண்ணெடுத்தே

                                               அவையிருவர்    வாழ்வொளிர

                               மொழிவதுவோ             கண்தான           விந்தை



                           2.பெண்ணினத்தின்        இடஒதுக்குச்       சட்டம்

                              பெண்களுக்கேன்        இடைமறிக்கத்    திட்டம்?

                                              அன்பொழுகும்    அரசியலார்

                                              அரங்கேற்றும்      நாடகத்தின்

                              பண்புகளோ                   பாதாளம்                மட்டம்



                         3.தொலைக்காட்சித்       தொடர்களின்         ஆட்சி

                            தொலைந்திடுமே        பெண்குலத்தின்    மாட்சி

                                        வலைப்போட்டு   மங்கையரை

                                        தலையுள்ள          முண்டமாக்கும்

                             நிலையெண்ணி           வருந்தும்மன             சாட்சி



                         4.ஏரிக்குள்            வேளாண்மைப்              பாரு

                            உரியநீரைச்      சேர்க்காத                         ஊரு

                                            மாரிநீரைத்     தேக்காமல்

                                            மடக்காமல்    வீணடித்தால்

                            நீர்நிலைகள்      நிலைபெறுமா               கூறு ?

                                                                                                             -இராதே

புகை - காவடிச்சிந்து

                                     நஞ்சு         மேவும்புகை

                                     மிஞ்சும்    வாயின்வழி

                                          நன்றே       ஓடிப்          பற்றுமே  -  மூச்சு

                                          தன்னை     நாடிச்        சுற்றுமே  -   உடல்

                                          நன்மை      யாவும்      வற்றுமே -   தீமை

                                                    நாடும்     போதையினைக்

                                                    கூடும்       பாதைவிட்டு

                                         நகர்த்து      வோமே     முற்றுமே  !                         ( 1 )



                                  வஞ்ச        மானபுகை

                                  தஞ்ச         மாகிவிட

                                      வந்து         சேரும்            புற்றுமே   -   மேனி

                                      நொந்து     வீழும்             இற்றுமே   -   காசம்

                                      குந்தி         நோவும்          தொற்றுமே   -   உளம்

                                            வாடிப்     போகும்படித்

                                            தேடிப்      போனதெண்ணி

                                     வருந்து          வாயே        கற்றுமே  !                          ( 2 )



                                கந்த        லாகிவிடும்

                                வெந்து   நுரையினீரல்

                                         கக்கும்       நஞ்சும்      ஆளுமே   -   தும்மல்

                                         மிக்கும்     சத்தம்        மூளுமே   -   உயிர்த்

                                         திக்கும்      ஊஞ்சல்      நீளுமே   -   செந்நீர்

                                              காட்டும்   பாய்ச்சலிலே

                                              ஓட்டம்     மாய்ந்திடவே

                                         கடிதில்    வாழ்வு        மாளுமே  !                         ( 3 )



                              சிந்தும்     கோலவிழி

                              முந்தும்    நீரினிழை

                                        நம்பும்       காதல்       மிஞ்சுமே   -   இணை

                                        எம்பும்       ஆசை       துஞ்சுமே   -   நாளும்

                                        தெம்பும்    இன்றி      அஞ்சுமே   -   புகை

                                              தீரா        மோகம்விட்டு

                                              வாரா    தேகும்படிச்

                                       செய்யு       மாறே      கெஞ்சுமே  !                         ( 4 )
                                                                                              -இராதே

                                                                                                     
        

துளிப்பா - 13

                                                    1.வேடிக்கையான   விந்தை
                                                        கயிற்றில்   நடக்கும்
                                                        குழந்தைத்   தொழிலாளி


                                                    2.பக்கங்களைப்   புரட்டினேன்
                                                       மயிலிறகு
                                                       நினைவலைகள்


                                                    3.காத்திருப்போர்   பட்டியல்
                                                       ஓடையில்
                                                        கொக்கு


                                                     4.கருத்தரங்க   மேடை
                                                        ஞெகிழியில்   ஜொலித்தது   பதாகை
                                                        சுற்றுச் சூழல் காப்போம்


                                                     5.அப்பாவின்   நினைவு   நாள்
                                                         காக்கைக்குச்   சோறு
                                                         பூனையை   விரட்டினர்

                                                                                                         - இராதே

                                                   
                                                    

துளிப்பா - 12

                                                      1.கதிர்   வீசும்   கோபுரங்கள்
                                                         தேடியும்   கிடைக்கவில்லை
                                                         சிட்டுக் குருவி


                                                     2.சாணி   உருண்டையில்
                                                        பூசணிப்   பூக்கள்
                                                        ஓ...மார்கழி


                                                     3.அழகாய்   மெழுகு   பொம்மை
                                                        மெல்ல   உருகிறது
                                                        மனசு


                                                     4.தொங்கும்   தோட்டம்
                                                        மாடிச்   சுவரில்
                                                        அரசமரம்


                                                     5.பறவைகள்   கழிப்பிடம்
                                                        சிலைகளின்   தலை
                                                        ஈகை

                                                                   -இராதே

துளிப்பா - 11

                                                 1.மழை   நின்றும்
                                                    குடை   பிடிக்கிறது
                                                    காளான்


                                                 2.அழகிய   வலை
                                                     யார்   கற்றுத்  தந்தார்கள்
                                                     சிலந்திக்கு ?


                                                 3.பெய்து   கொடுத்தது   மழை
                                                     மகிழ்வில்   மழலையர்
                                                     விடுமுறை


                                                4.கல்லூரி   வாசல்
                                                   சாமரம்   வீசும்
                                                   இமைகள்


                                               5.பட்டுப்   புழுவின்
                                                  மரண   ஓலை
                                                  புடவை

                                                                          -இராதே

துளிப்பா -10

                                                  1.சிறுவர்   கையில்
                                                     ஜவ்வு   மிட்டாய்
                                                     கடிகாரம்
                                                 


                                                 2.ஸ்டிக்கர்   கோலம்
                                                    கொத்தித்   திரும்பின
                                                    குருவிகள்
                                                   



                                                 3.குழாயடிச்   சண்டை
                                                    குடத்தில்   வழிகிறது
                                                    தண்ணீர்



                                                 4.பசியில்   குழந்தைகள்
                                                    பால்   அபிஷேகத்தில்
                                                    பதாகை                 



                                                 5.தனியார்   கல்லூரிகள்
                                                    கறவை   மாடு
                                                    பெற்றோர்

                                                                          -இராதே
                                                      

நிலவு

                                              இரவு     வான     வீதியிலே

                                              இருளைப்     போக்கி     வெளிச்சம்பெற

                                              இரவல்     பெற்று     ஒளிவீசி

                                              இயங்கும்     ஓருகோள்     சந்திரனாம்  !



                                             தானே     சுழன்று     புவிச்சுற்றும்

                                             தனியழ     குடனே     மறைந்துவிடும் ;

                                             தானாய்     மீண்டும்     வளர்ந்துவரும்

                                             தனியொரு     துணைக்கோள்     புவிக்கிதுவாம்  !



                                            முழுமை     அடையும்     வளர்பிறையை

                                            முழுநில     வென்றே     அழைக்கின்றோம் ;

                                            முடிவை     எட்டும்     தேய்பிறையோ

                                            முழுதும்     கருத்த     காருவாவாம்  !



                                            நிலவின்     ஈர்ப்பு     விசையதனால்

                                            நிலத்தில்     கடல்நீர்     உயர்ந்திறங்கும் ;

                                            நிலையில்     லாமல்     அலையெழும்பும்

                                            நிகழும்     இச்செயல்     ஓதங்களாம்  !



                                           நிலவில்     இறங்கி     கால்பதித்து

                                           நிலைப்பெற்     றார்நீல்     ஆம்ஸ்ட்ராங்கே !

                                           நிறைந்த     மதியுடை     நம்தேசம்

                                           நிலவில்     நின்று     கொடிநாட்டும்  !

                                                                                                                     -இராதே

துளிப்பா -9

                                                  1. துளிர்க்கும்    கண்ணீர்
                                                      துகில்    உரிக்கும்
                                                      வெங்காயம்


                                                  2. சல்லடையில் சலிக்கும்
                                                      தண்ணீர்
                                                     ஓ. . . பனிக்கட்டி


                                                 3. இறந்த    பின்வாழ்வு
                                                     இருவர்    விழிகளில்
                                                   ''விழிக்  கொடை''


                                                4. கோழி    மிதித்து
                                                    குஞ்சு    முடம்
                                                   ''சுனாமி''


                                                5. விரலின்    பிரசவம்
                                                    விடைபெறும்    பிறைநிலா
                                                    நகம்

                                                                   -இராதே

புதுச்சேரி -காவடிச்சிந்து

வங்கத்                       திரைக்கடல்                          ஓரம்  -    வாழும்

       வண்ணத்            தமிழரின்                               வீரம்  -   கொட்டும்

             மொழியின்மழை    பொழியும்வரை

              எழிலின்உரை         பெருகுந்தமிழ்க்       கூறும்

                                                                      நாளும்       ஊறும்  !                              ( 1 )


திங்கள்                      ஒளிக்கதிர்                             பாயும்  -   வானில்

        சித்திர                விண்மீன்கள்                        மேயும்  -  பச்சைப்

               படருங்கொடி      நனையும்படி

               தொடரும்படி      குளிரும்வளி              வீசும்
             
                                                                தமிழ்              பேசும் !                                  ( 2 )


பொங்குந்                    தமிழர்கள்                             பாசம்  -  இங்கே

         போதை              தருந்தமிழ்                            வாசம்  -  சொட்டும்

               நறையின்சுவை       உணரும்வரை

               நிறையும்வினை      அறியும்மொழி     கூடும்

                                                                             உற      வாடும்  !                              ( 3 )


சங்கத்                          தமிழ்வளர்                            கூடு  -  உயர்

       தமிழொ               ளிபூத்த                                   வீடு  -  அவர்

            உழைக்குங்குடி      உழைத்தோங்கிட

             பிழைக்கும்படி        நிலைகூறிய              சொந்தம்

                                                                தமிழ்ச்              சந்தம்  !                              ( 4 )


தங்கும்                           இயற்கையைப்                 பாடி  -  வாணி

       தாசன்                      மகிழ்தானே                       கூடி  -  நனி

            எழிலோவியம்       தரும்பாவியம்

            பொழிலாமது         பெரும்ஓவியந்            தீட்டும்

                                                                      புகழ்            மீட்டும்  !                             ( 5 )


எங்குமே                        பாவேந்தர்                          பாட்டு  -  வீர

       எழுச்சி                     உணர்வினில்                   கேட்டு  -  கன்னித்

            தமிழ்மேவிட            புவிமீதினில்

           அமிழ்தாங்கவி         சுவையுறுநீ               ரூற்று

                                                             ஒளிக்                கீற்று  !                                 ( 6 )


பங்கயத்                      தேன்தமிழ்                           வாடை  -  சிந்து

      பாரதி                      பாடிய                                    மேடை  -  அவன்

           புரட்சிச்சுனை           வழிந்தோடிய

           திரட்சிக்கொள         நலங்கூடிடும்            ஏரி

                                                                    புதுச்            சேரி  !                                   ( 7 )


இங்குச்                         சூழுங்கவிக்                        கூட்டம்  -  பாடல்

       எல்லோரும்        கற்றிட                                  நாட்டம்  -  இந்தப்

            புதுவைதனில்       உயர்வாழ்வதில்

            பொதுமைநிலை   சிறந்தோங்குதல்      அருமை

                                                                         மிக்க      பெருமை  !                          ( 8 )

                                                                                                          -இராதே