இராதே

இராதே
eradevadassou

வெள்ளி, 5 ஜனவரி, 2018

துளிப்பா - 52

தவளை தாளத்தில்
ததிகினத்தோம் போடும்
மழை
ஈசல்கள்
எக்கச்சக்கமாய்
எண்ணெய்த் தாள்
தூக்குத் தண்டனை
தொங்குகிறது
மனித நேயம்
இன்னும் உறுத்துகிறது
நினைவல்ல
துரோகம்
ஒற்றைப் புல்லின் தலையில்
நீர்க்குடம்
பனித்துளி
                                                               - இராதே
இடுகையிட்டது நேரம் கருத்துகள் இல்லை:
லேபிள்கள்:

துளிப்பா - 51

குளத்து கோப்பையில்
ஒருதுண்டு நிலாதொட்டு
பசியாறுகிறது இயற்கை
ஒரு குடம் தண்ணீர்
அதிலும் ஓட்டை
நத்தை
வெளியில் கூச்சமின்றி
உடை கழற்றுகிறது
பாம்பு
பார்வை பாய்ச்சலில்
களவாடப்படுகிறது
நூலிடை
சிக்கல்களில்
முக்கியப் புள்ளிகள்
சிக்குக் கோலம்
                                          - இராதே
இடுகையிட்டது நேரம் கருத்துகள் இல்லை:
லேபிள்கள்:

வியாழன், 4 ஜனவரி, 2018

தனிமை

நிழல் குல்லா
மாட்டிவிடும்
மரங்கள்
பாதங்களுக்குப்
பனி உணர்த்தும்
புற்கள்
வண்ணங்களின்
வகை அறிவிக்கும்
மலர்கள்
கீச்சிடல்களால்
இருப்பைப் பதிவிடும்
பறவைகள்
இறந்த காலங்களைத்
தோண்டிப் பார்க்கும்
நினைவுகள்
இப்படியாக
தனி ஆவர்த்தனம்
வாசித்தபடி இருந்தது
தனிமை
- இராதே
இடுகையிட்டது நேரம் கருத்துகள் இல்லை:
லேபிள்கள்:

பிணம்

புகழ் , பெருமை
பட்டம் , விருது
பதவி , பணமென
அடையாளங்களேந்தி
வானுக்கும் பூமிக்குமாய்க்
குதித்தபடி இருந்தது
மனம்
நீ யாரென்றேன் ?
ஒவ்வொன்றாய்
அடையாளங்களைக்
கழற்றி வீசியது
களைந்ததில் மிஞ்சியது
பிணம்
குதித்தபடி இருந்த
மனத்தினைத் தேடினேன்
காணவில்லை ?
- இராதே
இடுகையிட்டது நேரம் கருத்துகள் இல்லை:
லேபிள்கள்:

பொழுது

யாருமற்ற வெளியில்
நான்
நேரங்கள் சிந்தனைகளால்
களவாடப்பட்டன
என்னை
ஏறஇறங்கப் பார்த்துத்
தலைகோதி சென்றது
காற்று
யாரடா இவன் ?
எரிச்சல் பார்வையில்
மௌனம் சாதித்த
மரங்கள்
கைகள் பிடுங்கியப்
புற்களில் பனிநீர்
அழுகை
அகல விரிந்த
விழிகளுக்குள்
கவிதை பிறந்த மகிழ்வில்
பொழுது விடிந்தது !
- இராதே
இடுகையிட்டது நேரம் கருத்துகள் இல்லை:
லேபிள்கள்:

ஐயனார் கோவில் முட்டை

யாருமற்ற இரவில்
சுற்றும் முற்றும்
நோட்டம் விட்டபடி
அடியெடுத்து வைக்கிறான்
மஞ்சைப்பைத் துழாவியதில்
வெளிவந்த முட்டை
உதடுகளின் உச்சரிப்பில்
சிலநொடிகள்
உருவேற்றலின் பின்
ஐயனார் குதிரையின்
கால்களில் தஞ்சமடைகிறது
முட்டை வைத்தாகிவிட்டது
யாருக்கு வலிக்கிறதோ? இல்லையோ?
முட்டையிட்டக் கோழிக்கு
கண்டிப்பாய் வலித்திருக்கும் !
- இராதே
இடுகையிட்டது நேரம் கருத்துகள் இல்லை:
லேபிள்கள்:

சருகுகள்

மெல்லஅடியெடுத்து
வைக்கும்போது
சர் என்றும்
வேகமாக ஓடும்போது
சரசர என்றும் ஒலியுணர்த்தலில்
வலியினைப் பரிமாறிக் கொள்கின்றன
கிளைகளிருந்தபோது
வருடிய காற்றில்
சலசலத்தும்,
சிலிர்த்தும்
புயல்காற்றில்
ஓவென்று கதறியும்
மழையில் நனைந்ததில்
கண்ணீராய்ச் சொட்டியதும்
இளமை கால நினைவுகள்
காய்ந்து உதிர்ந்து
காலடிகளில்
மெறிபட மெறிபட
பட்டறிவில் பிடிபடுகிறது
வாழ்க்கை !
- இராதே
இடுகையிட்டது நேரம் கருத்துகள் இல்லை:
லேபிள்கள்:
இதற்கு குழுசேர்: இடுகைகள் (Atom)