பனி

( காவடிச் சிந்து )

விண்ணூ ரிடம் பிறந்த

மின்னா ரொளி படைத்த

விலைவயி ரக்கொடை

மிகுமகு டத்துறை கற்களே ! - அதை

விடியலு றும்பொழுது

நெடுதலை யேற்றிடும் புற்களே !

பொன்னா மிளிர்த் துளிகள்

கண்ணா மொளித் தொழுகும்

பொழிலுறும் புத்தணி

அழகினை இட்டிடும் முத்திதோ ? - நுகர்

புதுமணம் முந்திடும்

குளிர்தரு வெள்ளரி வித்திதோ ?

வெண்பொன் துகள் பரவல்

கண்முன் படர் சரிகை

விழிஉவ கைப் பெரும்

வரைஉடை நுரைமிகும் போர்வையோ ? - பனி

மெருகிட மென்சிலிர்

குளுகுளு தந்திடும் பார்வையோ ?

மென்பஞ் செனப் பரவும்

வெந்தஞ் சியும் மறையும்

வியனுறு வெண்பனி

நழுவுத லின்புறும் நெஞ்சமே ! - புவி

விழுமிய தென்முனை

வடமுனை மென்பனி மஞ்சமே !

நீரா வியுங் குளிரும்

சீரா கவும் படரும்

நெடுமலை யில் நிகழ்

உறைபனி அண்டிடும் திண்மமாம் ! - அது

நிறைபடு நன் நதி

நிலைபெறும் என்பதும் தொன்மமாம் !

ஆறா வெயில் எரிய

ஆறா கிடும் பனியும்

அலைதலு டன் சில

பரவையும் பன்மடங் குயருமாம் ! - வையம்

அழிபடும் துன்பமும்

துயரமும் மண்டுட அயருமாம் !

- இராதே

பரவை : கடல்

அயர் : வருத்தம்

                              குருதி

                    ( காவடிச்சிந்து )

செந்தே  னிறமுடைய  நீராம் ! -  உட லோடிடும்

     செந்நீ  ரெனஅணையும்  பேராம் ! -அது

               சிந்திடவீ  ழாமலுடல்

               தன்னுடன்அன்  றாடவலம்

     சென்றிடும்  மாண்பமையும்  சாறாம் ! - தொடர் சுற்றிடும்

     செய்கையின்  னுயிர்வளர்  சீராம் !

சந்தடி  யில்லாமலுடல்  ஊறும் ! -  ஊட்டச் சத்தோடு

     சகலமி  டமும்நிதம்  சேரும் ! - நின்று

               சக்கையுறும்  சேர்கழிவை

               மிக்க அழ  காய்விளையும்

     தக்கவினை  யினால்வெளி  யேறும் ! -  செஞ்சீர் அணுவின்

     சாதனைஇ  தையெடுத்துங்  கூறும் !

நுண்ணிய  அணுவுங்காக்கும்  எல்லை ! -  வரும் நோய்த்தொற்று

     நுண்ணுயி  ரழிக்கும்அணு  வெள்ளை ! - உயர்

               நுட்பமுடன்  தட்டையணு

               வெட்டுடலின்  செங்குருதி

     நொந்தெழச்  செய்வதுவே  இல்லை ! - அணு மூன்றினில்

     நுண்செய  லீர்க்கும்உள்ளங்  கொள்ளை !

உந்துமே  இதயநொடி  தோறும் ! - உயிர்க் காற்றினை

     யுறிஞ்சும்  செங்குருதியும்  சீறும் ! - எலும்

               புள்வளரும்  மஜ்ஜையினி

               லுள்மலரும்  நல்லணுவும்

     உற்றபடி  சுரந்துடம்  பூறும் ! - சுழன் றோடிடும்

     உதிரத்  தில்உரமு  மேறும் !

செய்திடுவோம்  செங்குருதி  ஈகை ! - உயிர் மீட்டிடும்

     செயலிலுங்  கிட்டும்புகழ்  வாகை ! - ஆறு

               திங்களென  ஓர்முறையும்

               தங்கமன  எண்ணமுடன்

     செய்யுங்கொடை  மகிழ்ந்தாடும்  தோகை ! - உயர்ந் தோரிடும்

     செய்கையினால்  மனம்பெறும்  ஓகை !

மெய்யுணர்வை  மீட்டிவிடும்  சுருதி ! - இழப்போ மெனில்

     மேவுமு  யிர் அடைந்திடும்  இறுதி ! - திகழ்

               மெல்லுடலை  நல்லபடி

               செல்லுபடி  யாகும்படி

     மேனிநலங்  காப்பதுதான்  குருதி ! - உயி ராண்டிடும்

     மென்குருதி  காக்கயேற்போம்  உறுதி !

                                                                                                                     - இராதே

ஓகை; உவகை

 வினைத் திட்பம்

திண்செய லுற

திடமனங் கொளும்

சீர்வினைத் திட்பம் ! - நிதம்

எண்ணிய செயல்

எண்ணிய படி

எய்திடும் நுட்பம் !

உயர்நிலை யுற

உழைத்திடும் செய

லுறுதியில் ஆண்மை ! - ஆளும்

உயர்கருத் திடை

உளம்புகுந் ததில்

உயர்ந்திடும் மேன்மை !

செய்திடும் செயல்

திறத்தினை வாயும்

செப்புதல் எளிது ! - அதை

செய்திட வாய்

செப்பிய படி

செய்வதோ அரிது !

சிறுவுறு வென

சிலர்மனத் தினை

சிதைப்பது குற்றம் ! - முறை

திருத்தேர் செல

சிறுவச்ச துவே

சிறப்புறு சுற்றம் !

தொடரிடர் நிலை

துயரறும் படி

துடைத்திடல் நன்று ! - கடுந்

தொடரிடர் வரின்

துணிவுடன் அதை

துரத்துவோம் வென்று !

நற்செய லினை

நடத்திடும் வழி

நடப்பதில் உறுதி ! - இதை

விற்கணை யென

விரைவுடன் செய

வெல்லுதல் இறுதி !

- இராதே

 மழையே வாழ்க !

( அமுதே ! தமிழே ! )

மழையே ! மழையே ! அழகிய

மழையே ! பெருமழையே !

மழையே ! மழையே ! அழகிய

மழையே ! பெருமழையே !

மழைதரும் நீர்வளம் பார்!

மழைதரும் நீர்வளம் பார்!

மனதினில் மகிழ்வினில் ஆழ் !

மனதினில் மகிழ்வினில் ஆழ் !

மழையே நாளும் நீ வாழ்க !

மழையே நாளும் நீ வாழ்க ! ( மழை )

வானூறும் நீராரம் ! - வயல்

வெளியின் ஆதாரம் !

வானூறும் நீராரம் ! - வயல்

வெளியின் ஆதாரம் !

வரு மழையே ! பெரு மழையே !

வளமையினைத் தரு மழையே !

வான் மெழுகாய் உருகும் பெருகும்

அதில் உயிர்கள் மகிழ்ந்து போகும் ;

வான் மெழுகாய் உருகும் பெருகும்

அதில் உயிர்கள் மகிழ்ந்து போகும் ;

பூ மயிலும் கொண்டாடும் மழையே

நாளும் நீ வாழ்க ! ( மழை ) ( 1 )

அன்றல்ல இன்றல்ல என்றென்றும்

நீர்வளங்கள் ;

அன்றல்ல இன்றல்ல என்றென்றும்

நீர்வளங்கள் ;

மழை பொழிய நிரம்பி எழும் !

மலை யருவி பெருகி விழும் !

நீர்நிலையும் நிலமும் உழவும்

நீயிருந்தால் மரணமேது !

நீர்நிலையும் நிலமும் உழவும்

நீயிருந்தால் மரணமேது !

பொன்னுலகில் நீர்ப்பாய மழையே

நாளும் நீ வாழ்க ! ( மழை ) ( 2 )

பெய்யாமல் தீங்கிழைக்கும் பெய்திங்கே

நன்மை தரும் !

பெய்யாமல் தீங்கிழைக்கும் பெய்திங்கே

நன்மை தரும் !

நிறைமழையாய்ப் பொழிந்தே எழும் !

குறைமழையாய் ஓய்ந்தே விழும் !

உயிருணவும் உடையும் உயர்வும்

நீயிருந்தால் உலகிலுண்டு !

உயிருணவும் உடையும் உயர்வும்

நீயிருந்தால் உலகிலுண்டு !

மண்ணுலகில் நீர்வாழ மழையே

நாளும் நீ வாழ்க ! ( மழை ) ( 3 )

- இராதே

Like

Comment

Share

 தீ நுண்மி ( கொரோனா )

( காவடிச் சிந்து )

( பவணக்கி ரியதனுள் தானே - மெட்டு )

பரவும்நுண் ணுயிர்ச்செய லாலே ! - மண்ணின்

மேலே ! - படு

பாழும்நோயொடு மேலுந்துன்புற

வாழும்பேருயிர் போகுமென்பதை

பாராய் ! - கூட்டம்

சேராய் !

கரவுப்ப கைமுடிக்கும் நோயே ! - புன்மை

தீயே ! - வழி

காணவேஒரு ஆளுமிங்கிலை

வீணதாய்ப்பொருள் போவதெங்கென

காணோம் ! - ஊமை

யானோம் !

இருமல்ச ளிவருமப் போதே ! - நாள்தள்

ளாதே ! - காய்ச்சல்

ஏற்றமாய்மிக மூளுந்தீங்கினை

மாற்றவேமருந் தோடுவாழ்வதன்

ஈடே ! - சொல்வ

தேடே !

அருகும்நு ரையீரலி னூடே ! - நுண்மி

கூடே ! - புக

ஆட்டமாடிட மூச்சுந்தேய்பட

ஓட்டமேயற மாயுமாமுடல்

ஆவி ! - திணறல்

மேவி !

விலகித்த னித்திருப்ப தாமே ! - நன்மை

யாமே ! - இதை

வீட்டிலேஅரங் கேற்றிப்பார்த்திட

நாட்டிலேதின ஊன்றிமேவிடு

வாயே ! - நிற்கும்

நோயே !

நிலவும்உ யிரிழப்பும் போமோ ? - நம்ப

லாமோ ? - மக்கள்

நேர்த்தியாய்நெறி மீறிடாதுடன்

தீர்வுநோக்கிடல் கானல்போலுள

நீரோ ? - வெல்லு

வாரோ ?

திடமற்றஎ திர்ச்சத்தில் லாதே ! - உடல்

மீதே ! - மிக்க

தீரமாயுடன் ஏகியேஉயிர்

சோரவேபிணி கோரத்தாண்டவ

தீதே ! - சாவின்

தூதே !

நடமிடுமு ளத்துணிவி னோடே ! - மாய்ப்போம்

கேடே ! - தொற்று

நாளுமேபர வாமல்செய்திட

ஆளுமையுடன் நோயைவீழ்த்தினி

நாமே ! - மகிழ்

வோமே !

- இராதே

 கண்ணதாசன்

(காவடிச்சிந்து)

தேட லேபணியென் றாடத் தொழுந்தமிழ்

நேசனைக் - கண்ணனவன்

தாசனை - எண்ணத்

திகட்டத் திகட்டப்பாயும்

அகமே வும்புகழ்ஞான வாசனை !

பாட லின்பமிகுந் தோட உருளுந்தே

ரோட்டமே !- சந்தத்தின்பந்

தாட்டமே ! - எழுத

கூடும் மயிலிறகால்

ஓடு மேதமிழ்ப்பகைக் கூட்டமே !

வெள்ளித் திரையினூடே துள்ளித் தி்ரியுமவன்

பாடலே ! - இசைத்தேந்தமிழ்ச்

சூடலே ! - மாந்தம்

வெல்லுந் தத்துவங்கள்

சொல்லும் வையகத்தின் சாடலே !

அள்ளச் சுரப்பினுள்ளே மெல்லப் பெருகுங்கவித்

தேறலே ! - அறிவினுயர்ச்

சீறலே ! - சொற்கள்

மேவும் பண்முகிலால்

தூவும் செம்மொழியின் தூறலே !

கம்பன் கவிநயத்தில் தெம்பி லுளந்திளைத்

சிந்தையே ! - அருந்தமிழின்

சந்தையே ! - சித்தர்

காவி யம்பலகற்றுப்

பாவில் கொடுத்ததுன்றன் விந்தையே !

வம்பாம் அரசியலில் எம்பிக் குதித்தெழுந்த

தீரரே ! - அதிர்ந்தொலிர்ந்த

சூரரே ! - தமிழ்

வாழ வேஉயிரென்று

வேழ மாய்மொழிகாத்த வீரரே !

மங்கை மார்கள்மதுரங்கள் பட்டறிவுச்

சொல்லியே - வீசுங்கருத்து

மல்லியே ! - மன

வாசக் கண்ணனிடம்

பாசத் துடன்படர் வல்லியே !

சந்த யாப்பினிலும்சிந்து யாப்பினிலும்

மன்னனே ! - உயிர்மொழியன்பின்

தென்னனே ! - கன்னித்

தமிழ்ப் பேருலகென்றும்

அமிழ் தாமெனப்போற்றும் பொன்னனே !

- இராதே

9You, பக்கிரிசாமி தியாகராஜன், Thirumal Govindaraju and 6 others

2 Comments

Like

Comment

Share

Yenthayum Thayum (எந்தையும் தாயும்) - (21-04-2019)