முலாம்பழம்
வேனில் கால பழமிதாம்
வேட்கைத் தணிக்கும் பழமிதாம் ;
ஊனின் சூட்டைக் குறைக்கவே
உடனே உதவும் பழமிதாம் ;
சீனி நோயைத் தடுக்குமாம்
சிரங்கை வராது முடக்குமாம் ;
மேனிச் சோம்பல் முறிக்குமாம் ;
மேன்மை பழமாம் முலாமே !
புத்து ணர்ச்சி யூட்டுமாம்
புதிய தெம்பைக் கூட்டுமாம் ;
நித்தம் தொற்றை ஒழித்திட
நெடிய பணிகள் ஆற்றுமாம் ;
இத்துத் தேயும் எலும்பினை
எழுச்சி காண வைக்குமாம் ;
மெத்த மூளைச் சோர்வினை
மீட்கும் பழமாம் முலாமே !
குருதி அணுக்கள் பெருக்குமாம்
குருதி கட்டை உடைக்குமாம் ;
உறுத்தும் சிறுநீர்க் கற்களை
உருவா காமல் போக்குமாம் ;
இறுக்கம் நரம்பைத் தளர்த்தியே
இரவில் தூக்கங் கொடுக்குமாம் ;
அறுக்கும் அனைத்து நோய்களை
அகற்றும் பழமாம் முலாமே !
- இராதே
கருத்துகள் இல்லை:
கருத்துரையிடுக