இராதே பக்கங்கள்

வியாழன், 15 ஆகஸ்ட், 2013

சாதீ

சாயம் போன
துணியானாலும்
இன்னும்
தைத்துப் போட்டுக்
கெடுத்துக் கொண்டிருக்கும்
சமூகச் சீரழிவுச்
சட்டை !

அடித்து
துவைத்து
துப்புரவு செய்ய
வேண்டிய
கரை படிந்த
அழுக்கு !

பரணை சமுக்காளத்தை
தட்டியதில்
கிளம்பிய நெடியாய்
துன்புறுத்தும்
ஒவ்வாமை !

சாணிப் பால்
குடிக்க வைத்து
தொண்டைக் குழியில்
குமட்டலாய் வந்த
வாந்தி !

சவுக்கடி
சரித்திரத்தை
வரிகளாய்
முதுகில் எழுதிய
வரலாறு !

தாகம் தீர்க்காமல்
தவிக்க விட்டுவிட்டு
வியர்வை வரவழைத்து
வேடிக்கைப் பார்க்கும்
விக்கல் !

விலாசம் தெரியாமல்
விரடியடித்து
இருட்டிப்பு
செய்ய வேண்டிய
சிக்கல் !

காதலைச்
சாம்பலாக்கிய
காட்டுத் தீ !

பிடரிப் பிடித்து
தள்ளவேண்டிய
பித்தலாட்டம்
இதுதான்
சாதீ !!
- இராதே

காதல் புலம்

நீ
கவிதை களம்
காதல் புலம்
ஓரக்கண் விசையால்
ஈர்த்து விடுகிறாய் !

மின் புலத்திற்கும்
காந்த புலத்திற்கும்
உள்ளதை விட
காதல் புலத்திற்கு
சக்தி கொஞ்சம்
அதிகம்

சொடுக்கும் பார்வையில்
சொக்கவைத்தே
இதய இடுக்களில்
நிரம்பி வழிகிறாய் !

உன்
மனதிற்குள்
பாயத் துடிக்கிறேன்
அட . . .
எவ்வளவு ஆழம் ?

மூழ்கி முத்தெடுக்க
முடியவில்லை
திரும்பியபோது
இதழோரம் திரண்ட
முத்தங்களில்
திளைக்கின்றேன் !

இதய இருக்கையில்
இனிதாய் அமர்ந்தவளே
உன்
கண் சாடையால்
காணாமல் போனவர் பட்டியலில்
நானும் ஒருவன் !
- இராதே

ஞாயிறு, 11 ஆகஸ்ட், 2013

துளிப்பா - 17

1. வெடிக்கும் அடுப்புகள்
வேகும் பெண்கள்
மணக்கொடை

2. கும்மிருட்டு
மௌனம் உடைந்தது
இராப்பிச்சை

3. அழுகின்றன இலைகள்
ஓ. . .நின்றுவிட்டதா
மழை !

4. அரசாங் முட்டை
உடைந்தது
அம்மி

5. நாக்கைக் குழைக்கிறது
நாகம்
ஓ. . . தவளை !
- இராதே

துளிப்பா - 16

1. கல்லெறிந்த குளம்
தொடரும் வளையங்கள்
நினைவுகள்

2. கதை
சதை
வெற்றி திரைப்படம்

3. அச்சச் சோ
சட்டி சுரண்டும்
ஆங்கில கல்வி

4. அணுசக்தி ஒப்பந்தம்
உலை வைக்கும்
உறவு

5. உதடுகள் போர்த்திய
உன்னத ஆடை
மௌனம்
-இராதே

விழிக் கொடை

கண்களால் உலகைக் காணா
கண்ணிலார் நாட்டில் கோடி
கண்ணிலார் வையம் காண
கண்களோ தேவை கோடி
எண்ணிலா விழிகள் வேண்டி
எண்ணிக்கைக் குறைவை சுட்டி
எண்ணத்தில் ஈகை பூட்டி
எண்ணற்ற விழிகள் தருவீர் !

மண்போற்ற வாழ்ந்த வாழ்வு
மண்ணிலே மறையும் போது
கண்ணிலார் இருவர் வாழ
கண்களைத் தானம் செய்வீர் !
கண்பெற்ற இருவர் நெஞ்சம்
களிப்புடன் பாடல் கொண்டு
விண்பெற்ற மழையாய்த் தூறி
வியனுற வாழ்த்தும் ! வாழ்த்தும் !
-இராதே