தமிழின முரசு

பராங்குசனார்

( காவடிச் சிந்து )

செந்தமிழ்த் தேனூறும் வண்டு - மலர்ச்

செண்டு - கற்

கண்டு - நாளுஞ்

செம்மொழிக் காற்றிடுந் தொண்டு - புதுவைச்

சிவனார்மகள் சீர்ப்பூங்கொடி

தவமேவிய தமிழ்மாமணி

செப்பிடுந் தேன்மண வாளர் ! - இவர்

எப்போதும் மொழியின்பற் றாளர் !

சொந்தங்கள் கொண்டாடும் இன்பர் - உயிர்

நண்பர் - உயர்

பண்பர் - வாகை

சூடியே வென்றாளும் அன்பர் - ஈகைச்

சுடரேந்திடும் கொடைமாமனம்

உடனேதர வளமேவிய

சுற்றங்கள் போற்றிடும் வாசர் ! - மொழி

வெற்றிக்கு வித்திடும் நேசர் !

முந்திக்க ளங்காணும் தீரர் - செயல்

வீரர் - வெல்லுஞ்

சூரர் - புகழ்

முன்னோடும் திருக்கனூர்ச் சீரர் - உரிமை

முழவோசைகள் ஒலியேயெழ

வழக்காடிடும் பெருமாள்மகன்

முத்தமிழ் மீட்டிடும் அரசு ! - தமிழ்

நித்தமும் கேட்டிடும் முரசு !

சிந்தில் பராங்குசம் பாட்டு - மகிழ்

சீட்டு - பா

ராட்டு - துயர்

செப்புந் தமிழ்ப்பகை ஓட்டு - பெயர்

திருகூடிட வளவாழ்வினை

அருளாய்வுற புவிமேவிட

சிறியோன் 'ராதே'வின் சிந்து ! - என்றும்

செறிவாய் நிற்கும்நி னைந்து !

- இராதே

 

என்னை எழுதும் எழுதும் என்றே

மாமழை குதிக்குதே !

எந்தன் அழகை வரைக என்றே

மாக்கடல் துடிக்குதே !

முன்னும் பின்னும் எழுலு ணர்த்தி

இயற்கைவட்டம் சுழலுதே !

முந்து கின்ற முகிலி னங்கள்

முகமினிட்டே உழலுதே !

மின்னும் மின்னல் இடிய னுப்பித்

தன்னைப்பாட அழைக்குதே !

மேனித் தீண்டுங் குளிரின் காற்று

தன்விளக்கம் நுழைக்குதே !

வண்ண நிலவு முகமி னுக்கி

வண்ணம்பாட கெஞ்சுதே !

வான வில்லோ வடிவங் காட்டி

உரைக்குமாறு கொஞ்சுதே !

- இராதே

மண வாழ்த்து

காவடிச் சிந்து

மண வாழ்த்து அன்பின் அணைப்பினில் மிளிர்ந்தே - இணை ஒளிர்ந்தே - உளங் குளிர்ந்தே - மகன் ஆசை மணங்கொண்டே தெளிந்தே - தெய்வ அருள்பெற்றிட உயர்வுற்றிட திருநின்றிட நலமொன்றிட ஆனந்தத் திளைப்பினில் உன்னை - வாழ்த்தி தேனெனக் களிப்பேனிவ் வன்னை ! அன்பு ' வினோத்ராசு ' இன்பன் - உயர் பண்பன் - பழகும் நண்பன் - துயர் அண்டாமல் காத்திடும் அன்பன் - வாழ்வில் அமுதச்சுவை மனமொற்றிட குமுதக்குலம் அடியொற்றிட அன்றிலி ணை'அரிப் பிரியாள்' - மனம் ஒன்றியே பேசிடும் நெறியாள் ! சுந்தர புன்னகை வீசி - காதல் பேசி - நேயம் பூசி - ஆன்றோர் சுற்றங்கள் கூறும் ஆசி - என்றும் சுகமேவிடச் சுவையூரிட நகமோடிணை சதையாகியே சொந்தங்கள் மெச்சிட வாழ்க ! - வையம் சொக்கிட இன்பங்கள் சூழ்க ! மந்திர வாழ்த்துகள் தாவ - பூக்கள் தூவ -நெகிழ்ச்சி ஏவ - மன்ற மக்கள் உவகையில் மேவ - உறவு வடிவாகியே மாலைபோலெழ விடிவாகிட அலைபோலெழ மங்கல மாண்புகள் பூண்க ! - வளம் தங்கிடும் இல்லமே காண்க ! ( திருமதி மங்களம் அன்பழகன் கேட்டுக்கொண்டதற்கு இணங்க அவர்கள் இல்ல மணவிழா வாழ்த்து ! 14.11.2018 ஆம் ஆண்டு திருவிடைமருதூரில் நடைபெற்ற மணவிழா நிகழ்வில் வழங்கப்பெற்றது )

           வாடிவதங்கும் வையம் !

எடுப்பு

வாடி வதங்குது வையக மே - அதன்

வனப்பும் குறையுது நித்தமு மே ( வாடி )

தொடுப்பு

ஊடிப் பாய்ந்திடும் கதிர்களி னால் - வெப்பம்

ஊடே பரவிடும் கரிமத்தி னால் ( வாடி )

முடிப்பு

ஏரி குளங்களில் நீரிறங் கும் - அதில்

எப்படி ஊற்றுக்கண் உயித்தெழும் பும் ?

மாரி பொழிவது தவறிவி டும் - இனி

மாறியே பருவங்கள் உயிரெடுக் கும் ! ( வாடி )

வாரி திரையெலாம் மேலெழும் பும் - பெரும்

வளிகொண்ட அழுத்தத்தில் புவிநடுங் கும்

ஏறி கரையினைக் 'காலி' செய் யும் - ஊர்

எங்கிலும் துயரினைப் பதிவுசெய் யும் ! ( வாடி )

- இராதே

                          தாய்மொழி

எடுப்பு

இன்பத் தமிழ் மொழி எங்கே ?

ஏன் மறந்தார் கற்க இங்கே ? ( இன்ப )

தொடுப்பு

கன்னல்மொழி ஏனோ காணாமல் மறையுது ;

கன்னித்தமிழ் பேசும் ஆளுமே குறையுது ! ( இன்ப )

முடிப்பு

கன்னித் தமிழ்க்குரல் 'மம்மி' என்றது ;

காதடைத் தேஉள்ளம் அதிர்ச்சியில் நின்றது ;

தண்டமிழ் நடையோ ' வாக்கிங்கில் ' சென்றது ;

தன்னல ஆங்கில மோகமே வென்றது ! ( இன்ப )

தாய்மொழி பள்ளியில் தழைக்கா தழியுது ;

தடுக்காத அரசினால் தமிழுமே ஒழியுது ;

வாய்வழி செந்தமிழ் யாரிங்கே பொழிவது ?

மயக்கம் அறுத்திட யார்முன் மொழிவது ? ( இன்ப )

நல்ல தமிழ்பேச நாமே வெறுப்பதா ?

நாணப்பட் டேதமிழ் நவில மறுப்பதா ?

மெல்ல தமிழ்மொழி மேன்மை சிறுப்பதா ?

மேவிய ஆங்கிலம் கழுத்தை அறுப்பதா ? ( இன்ப )

நற்றமிழ் காத்திட நம்மை அளிப்போம் !

நாளுந் தமிழ்ப்பேசி நன்கே களிப்போம் !

உற்றவர் மற்றவர் ஊர்போற்றத் துளிர்ப்போம் !

ஒண்டமிழ் வாழ்க! வாழ்கவென் றொலிப்போம் ! ( இன்ப )

- இராதே

17You, Sugumaran Govindarasu, பக்கிரிசாமி தியாகராஜன் and 14 others

5 Comments

Like

Comment

Share

                     இனமானம்

சிரிப்பார் ; களிப்பார் ; குதித்திடுவார் ;

திணிக்கத் திணிக்கப் பிறமொழியை

விரிப்பார் ; மொழிவார் ; பிணைந்திடுவார் ;

விளம்பும் தமிழர் புகழ்மறப்பார் ;

நெரிப்பார் ; முறிப்பார் ; குரலடைப்பார் ;

நெறிசேர் தமிழின் விரலுடைப்பார் ;

வரிந்தே எழுந்தே முழுங்கிடுவார் ;

மானம் மதித்து மரிப்பாரோ ?

நடிப்பார் ; மறைப்பார் ; நரித்தனத்தால்

நலமாய் விளங்க நயந்திடுவார் ;

துடிப்பார் ; அழுவார் ; தொழுதிடுவார் ;

துரத்திப் பதத்தைத் துதித்திடவே

பிடிப்பார் ; விழுவார் ; வணங்கிடுவார் ;

பிறப்புக் குறித்து மதிப்பிழப்பார் ;

இடிப்பார் எவரும் திருத்திடினும்

இனமா னத்தை மறப்பாரே !

பெரியார் உரையால் முரசறைந்தார் ;

பெருமை படவே இனவுணர்வைத்

தெரியார் ; தெளியார் தெரிந்திடவே

திறமாம் உழைப்பை அளித்தனரே ;

சரியாய்ப் புரிந்து செயல்படுவோம் !

சரிவைத் தடுக்கத் திரண்டிடுவோம் !

உரிமை உயிர்க்கும் இனமான

உணர்வைப் பெருக்க முயன்றிடுவோம் !

- இராதே

10You, Hema Nambi, வேணு. ஞானமூர்த்தி and 7 others

1 Comment

1 Share

Like

Comment

Share

 நாடகத் தந்தை

தவத்திரு சங்கரதாசு சுவாமிகள்

( காவடிச் சிந்து )

சிந்தை நாடகம் மண்ணிடை வாழ்வித்த

தீந்தமிழ் சங்கர தாசர் ! - தமிழ்ச்

சந்தத்தி லாடிடும் நேசர் ! - உயர்

தீங்கனிச்சுவை சங்க நாடகம்

எங்கும்மேவிட கங்கையாறென

சென்றெலாம்புவி மீதினில் பேர்சொல

தீரமாய் ஓதிய ராசர் ! - கலை

சேர்ந்தெழ பேருப தேசர் !

எந்த நேரமும் சிந்தனைச் சொற்படி

எண்ணிடும் மாந்தவி லாசர் ! - இசை

பண்ணிடும் மெய்ஞான வாசர் ! - விண்

இந்தெழுந்து விளங்குவேளையில்

சிந்தெடுத்து முழங்கும் பாப்புயல்

ஈந்த நாடக மாகதை கூத்துகள்

எண்ணும் ப டிசெய்தார் மானே ! - அவர்

என்றென்றும் மாகவி தானே !

பொங்கு மாசனி இந்திரன் பாழ்எமன்

போன்றுள வேடங்கள் பூண்டார் ! - அஞ்சி

பூவைய ருள் சிலர் மாண்டர் ! - இனி

புண்ணியநதி தேடிபூம்புனல்

சென்றாடி துற வேந்தி நாடகம்

போடுதலிலை ஆனமுடிவிற் கேற்றபடி

புண்பட்ட நெஞ்சிடை நொந்தார் ! - கதை

புனைய மீண்டும்மு னைந்தார் !

எங்கும் நாடகம் என்றொரு சூழலை

எம்தமிழ் நாட்டிற்குத் தந்தார் ! - தமிழை

எங்கெங்கும் காணவி ழைந்தார் ! - சாமி

ஈந்தநல்லிசை நேர்த்திசந்தங்கள்

ஏந்தும்சிந்தோடு மின்னும் நாடகம்

எல்லோருங் காணுற நற்றமிழ்

இன்பங்க ளாளப் பொ ழிந்தார் ! - புதுவை

மண்ணிலே சாமி ம றைந்தார் !

- இராதே