' சிந்து '
கார்காலம்
எடுப்பு
பேரின்பம் பேரின்ப மே - தவப்
பேரின்பம் பேரின்ப மே
முடிப்பு
'வாரி'நீர் அளித்தது வான்மிசை ஈர்த்தது ;
வான்முகில் கொட்டவே இடியுடன் ஆர்த்தது ;
'பாரி'யைப் போல்மஞ்சு வழங்கிடக் கூர்த்தது ;
பாரெலாம் நீர்ப்பெற 'கார்காலம்' வார்த்தது ( பேரி )
வானங் கருத்தது மின்னல் விரிந்தது ;
வான்முகிற் கூட்டம் வளையத் திரிந்தது ;
கூனல் பிறையென நிலவுத் தெரிந்தது ;
கூடியக் கருமுகி்ல் மழையாய்ச் சரிந்தது ! ( பேரி )
கூட்டுக்குள் குருவிகள் கூடி இணைந்தன ;
கொண்டாடிக் கொண்டாடி மயில்கள் பிணைந்தன ;
ஓட்டிடை உருள்நீரால் முற்றங்கள் நனைந்தன ;
ஒழுகியச் சொட்டுகள் இசைதர முனைந்தன ! ( பேரி )
செடிகள் சிரித்தன ; மலர்கள் குளித்தன ;
தேனிதழ் வண்டுகளைப் பொந்துகள் ஒளித்தன ;
துடிப்பாய்த் தவளைகள் பாய இளித்தன ;
துள்ளும்மீன்கள் துள்ளிக் காட்சி அளித்தன ! ( பேரி )
கடற்கரை நண்டுகள் நடனம் புரிந்தன ;
கடலலை கல்பாறை மோதிப் பிரிந்தன ;
'சடசட' ஓசையில் 'மொக்குகள்' பொரிந்தன ;
'தனதன' யெனமனம் தாளங்கள் சொரிந்தன ! ( பேரி )
- இராதே
கருத்துகள் இல்லை:
கருத்துரையிடுக