வாழைப்பழம் (99)
குருதி அணுக்கள் பெருக்கும் பழமாம்
குருதிச் சோகை நீக்கும் பழமாம் ;
குருதி அழுத்தம் தடுக்கும் பழமாம்
குருதி மூலந் தீர்க்கும் பழமாம் ;
பெருமை சூழ்ந்த மூன்று கனியுள்
பெரிதும் கிடைக்கும் வாழைப் பழமாம்
அருமை பயன்கள் கொடையாய் வழங்கும்
அமுதக் கனியே வாழைப் பழமாம் !
நரம்புத் தளர்ச்சி நோய்கள் விலக்கும்
நாரின் சத்தால் குடலைக் காக்கும் ;
மிரட்டும் மலத்தின் சிக்கல் அறுக்கும்
மினுக்கும் உடற்தோல் தோன்ற உதவும் ;
திரண்டு மிகுமே மூளைத் திறன்கள்
தேற்றும் உடலை வாழைப் பழமாம் !
வயிற்றுப் போக்கைக் கட்டுப் படுத்தும்
மாலைக் கண்நோய் வராது நிறுத்தும் ;
உயிர்ச்சத் தளிக்கும் உயர்ந்த மருந்தாய்
உணவை எளிதாய்ச் செரிக்க வைக்கும் ;
துயிலை இரவில் வளர்க்கும் நீட்டும்
துன்பப் பக்க வாதம் விரட்டும் ;
உயிர்கள் நன்மை உறவு இயற்கை
உலகிற் கீந்த பழமே வாழை !
- இராதே
கருத்துகள் இல்லை:
கருத்துரையிடுக