பனங்கற்கண்டு ( 100 )
பதநீர்க் காய்ச்சக் கிடைக்கும் பொருளே
பனங்கற் கண்டாம் பனங்கற் கண்டாம் ;
இதயங் காக்கக் குருதி அழுத்தம்
இயல்பாய் இயக்கும் பனங்கற் கண்டாம் ;
இதமாய் மூளைச் செயலைத் தூண்டி
இழக்கும் நினைவின் ஆற்றல் பெருக்கும்
பதமாய்த் தொண்டைக் கட்டை நீக்கும்
பனங்கற் கண்டாம் பனங்கற் கண்டாம் !
உடலின் வெப்பஞ் சீராய் மாற்றி
உடனே குளிர்ச்சித் தருங்கற் கண்டாம் ;
உடலின் சோர்வைக் கடுதே போக்கி
உவகை மனத்தைத் தருங்கற் கண்டாம் ;
அடர்ந்த காசம், கண்நோய் விலக்கி
அதிக நன்மை தருங்கற் கண்டாம் ;
படரும் தோல்மேல் விரவும் சிரங்கின்
பரவல் தடுக்கும் பனங்கற் கண்டாம் !
சிறுநீர் அகத்தின் சிக்கல் அறுத்தே
சிறப்பாய் இயக்கும் பனங்கற் கண்டாம் ;
சிறுநீர்க் கற்கள் சிதைத்துக் கரைக்கச்
செய்யும் உணவு பனங்கற் கண்டாம் ;
திருவாய் நாற்றம் மணக்க வைக்கும்
திறன்கொள் மருந்துப் பனங்கற் கண்டாம் ;
இருமல் மார்புச் சளியை விரட்டும்
இயற்கை விருந்து பனங்கற் கண்டே !
- இராதே
கருத்துகள் இல்லை:
கருத்துரையிடுக