சாதிக்காய்
கனிவிதை சாதிக் காயாம்
காரமும் துவர்ப்பும் சுவையாம் ;
நனிப்பட நினைவின் ஆற்றல்
நல்கிடும் சாதிக் காயாம் ;
இனித்திடும் இளமைத் தோற்றம்
ஈன்றிடும் சாதிக் காயாம் ;
முனிந்திடும் மனநோய்த் தீர
முனைந்திடும் சாதிக் காயாம் !
முகத்திடைத் தழும்புகள் போக்கி
முகத்தினைப் பொலிவாய் ஆக்கும் ;
அகன்றிடுங் காற்றின் தொல்லை
ஆறிடும் அம்மை புண்கள்
தகர்ந்திடும் படியுங் கொழுப்புத்
தளர்ந்திடும் நரம்பும் எழும்பும் ;
நிகழ்த்திடும் உடல்சார் நன்மை
நிறுவிடும் சாதிக் காயே !
அடக்கிடும் வயிற்றுப் போக்கை
அடங்கிடா வேட்கை நீக்கும் ;
முடங்கிடும் மூச்சின் அழற்சி
முகிழ்ந்திடும் மனத்துள் மகிழ்ச்சி
தடைபடும் தூக்கம் மீட்டுத்
தந்திடும் சாதிக் காயாம் ;
விடைபெறும் செரிக்காச் சிக்கல்
வித்திடும் சாதிக் காயாம் !
- இராதே
கருத்துகள் இல்லை:
கருத்துரையிடுக