கடுகு (67)
கடுகுக் கடுகுக் கடுகுதான்
கார முள்ள கடுகுதான் ;
எடுக்கும் விக்கல், புளியேப்பம்
எதிர்த்துத் துரத்துங் கடுகுதான் ;
அடுக்கும் இருமல் தொல்லையை
அடக்கி நிறுத்துங் கடுகுதான் ;
ஒடுங்கா ஒற்றைத் தலைவலி
ஒடுக்கி விலக்குங் கடுகுதான் !
உடலின் பருமன் குறைத்திடும்
உடலில் வெப்பங் கூட்டிடும் ;
உடையும் கோடைக் கட்டிகள்
உப்பும் வயிற்றைச் சுருக்கிடும் ;
அடைக்கும் மூக்கைத் திறந்திடும் ;
அடர்ந்த சளியை முறித்திடும் ;
குடைச்சல் , வலிகள் ஓட்டிடும்
குறுகுஞ் சிறுநீர்ப் பெருக்கிடும் !
குருதிக் கொழுப்பை அகற்றிடும்
குருதித் தூய்மைக் காத்திடும் ;
குருதி அழுத்தம் சமப்படும்
குருதி அணுக்கள் மேம்படும் ;
பெருகும் எலும்பின் உறுதியும்
பிதற்றுங் காய்ச்சல் தணிந்திடும் ;
நெருடும் நோய்கள் ஓட்டிடும்
நேர்மை நண்பன் கடுகுதான் !
- இராதே
கருத்துகள் இல்லை:
கருத்துரையிடுக