இராதே பக்கங்கள்

வியாழன், 12 ஜூலை, 2012

மன்றல் -காவடிச் சிந்து ( 2 )

என்னவள் பூமெத்தை மஞ்சம் - பனி

துஞ்சம் - மலர்

நெஞ்சம் - அதில்

தஞ்சம் - மனம்

எத்தனை முறைதானோ கெஞ்சும் - வன

இளமாமயில் இனிதாமென நடமாடிடும் மழைவேளையில்

இளமையில் வாடுறேன் கண்ணே ! - என்

புலம்பலைத் தீரடி பெண்ணே ! (1)

தண்எழில் பூமெனி பட்டு - தேன்

சிட்டு - மலர்

மொட்டு - மின்னல்

வெட்டு - முத்தம்

சத்தமாய்த் தருவேனோ தொட்டு - நிலை

தடுமாறிடும் தனித்தாமரை இனிகாலையும் வருமோவென

''சடுகுடு'' ஆடிடும் மனசு ! - இன்பத்

தவிப்பினில் துள்ளுதே வயசு ! (2)

கண்ணொளி சிந்துமே சன்னல் - ஒளி

மின்னல் - மொழிக்

கன்னல் - வெட்கப்

பின்னல் - உனைக்

கட்டியே பிடிப்பேனிவ் வண்ணல் - குளிர்

கடுங்காற்றினில் உறவாடிடும் நிலவேயெனத் தினமேங்கியே

கடுமையின் சோகமாய் அல்லி ! என்

கரத்தினைப் பற்றினால் துள்ளி ! (3)

கண்ணேநீ மாபெருந் தோட்டம் - மதுவின்

ஊட்டம் - புத்

தாட்டம் - விடு

வாட்டம் - அட

காமனின் கலைகளில் நாட்டம் - அருங்

கனிமாதரு சுவையூறிட அணில்தேடிட மறைந்தாடிடும்

கனிகளால் கூடிய சோலை ! - உளங்

களியுறக் கூவிடும் மாலை ! (4)

உன்னிதழ் வார்த்தைகள் நுட்பம் - வினைத்

திட்பம் - கட்டும்

கப்பம் - மிதவைத்

தெப்பம் - கண்

உண்ணவே எழுந்திடுமே வெப்பம் - வரும்

உளமாதவள் கடைவீதியில் இடையாடவே அசைந்தாடிட

உளதிரை ஓடிடும் அரங்கு ! - நம்

உரசலை நீக்கிட கிறங்கு ! (5)

பெண்ணவள் கழுத்தோவெண் சங்கு - இள

நுங்கு - எழில்

பங்கு - வளர்

தெங்கு - நனி

பேதையோ ஊடற்கி டங்கு - தினம்

பிறந்தேகிடும் உணர்வாகிய தனியாசைகள் உருவாகிட

பேரின்ப ஊசலின் வீச்சு ! - அகப்

பெருமைகள் கூறுமே மூச்சு ! (6)

அன்புள்ள உன்கண்கள் அம்பு - பெருந்

தெம்பு - போகும்

வம்பு - தேன்

செம்பு - நல்

ஆதரவு தருவேனே நம்பு - ஊறும்

அருளாகிய மனம்பேசிட அறியாதவள் உளம்வாடிட

அருமையாய்ச் செய்திடும் குறும்பு ! இல்

லறத்தினைத் தந்திடும் அரும்பு ! (7)

பொன்னென மின்னுமே கிண்ணம் - சுழிக்

கன்னம் - ஒளிர்

வண்ணம் - என்றும்

திண்ணம் - நனி

பொத்திந டப்பாளே அன்னம் - தனி

பொலிவாகிய அலைமாகடல் கரைமீதினில் மிதந்தாடிட

பொலிவாக வீசுமே தென்றல் ! நமை

பொருத்தவே கூடுமே மன்றல் ! (8)

--இராதே

புதன், 11 ஜூலை, 2012

ஈழம் மலர . . . .

பதுங்கு குழிதனில் பெண்டிர் மழலை

பயந்து நெளிந்தோட ! - தினம்

ஒதுங்கத் துரத்திடும் வலியோர் செயலில்

உருண்டு புரண்டோட ! - விழி

பிதுங்கு முகத்துடன் மகளிர் கண்ணீர்

பிழிந்து வழிந்தோட ! - மனம்

ததும்ப ஒழுகிடும் உணர்வு நினைந்தே

ஒன்று திரண்டிடுவோம் !

வனத்தில் விலங்குகள் பார்த்து நடுங்கி

மருண்டு மிரண்டோட ! - பல

தினங்கள் உணவுகள் உடையு மிழந்தே

திகைத்துத் தவித்தோட ! -நடைப்

பிணமாய் உலவிடும் நெஞ்சம் திறந்தே

பிளந்து கனன்றாட ! - உள

உணர்வறு மடையரின் கொட்டம் அடக்க

ஒன்று திரண்டிடுவோம் 1

நெஞ்சத் துயரினில் கண்ணீர் பெருகி

நிறைந்தே உருண்டோட ! - கொடும்

வஞ்சத் தனத்தினில் செந்நீர் சுரந்தே

வளைந்து வளைந்தோட ! - கடும்

பஞ்சம் பிழைத்திடும் துன்பம் விளைந்து

பதைத்துப் பதைத்தோட ! - அவர்

கெஞ்சல் செவிதனில் நொந்தே உரைக்க

ஒன்று திரண்டிடுவோம் !

கொத்து வெடிகளில் தமிழர் மாய்ந்தே

குலைந்து குலைந்தோட ! - இளம்

வித்து கருகிட தனிமக் குண்டு

விழுந்தே எரிந்தாட ! - நனி

சத்துத் தமிழரின் குருதி பொங்கித்

தகித்துக் கொதித்தாட ! - நமை

ஒத்து விரட்டிடும் அரக்கர் அழிக்க

ஒன்று திரண்டிடுவோம் !

கலங்கிப் புலம்பிடச் சிவந்து சினந்தே

சண்டை அதிர்ந்தாட ! - எம்

இலங்கைத் தமிழரை வெடிகள் துரத்த

எழுந்து வெகுண்டோட ! - தெரு

விலங்கிற் கிணையென நடத்தி யொழிக்க

விரைந்து வினையாட ! - கண்

கலங்கும் விழிநீர் துடைக்கத் துணிந்தே

ஒன்று திரண்டிடுவோம் !

வேரில் அழிக்க வெட்டும் நிலையை

விடுவாய் என்றோத ! - கடும்

போரில் தமிழரை மீட்க முனைந்தே

பொறுப்பாய் நின்றோத ! - பெரும்

பாரில் பலகுரல் ஓங்கி ஒலித்தே

பதமாய் சென்றோத ! - அவ்

ஊரில் விரைவினில் ஈழம் மலர

ஒன்று திரண்டிடுவோம் !

--இராதே

செவ்வாய், 10 ஜூலை, 2012

குறும்பா - 2

சிறுமிக்கு மாப்பிள்ளை தவளை

சிறுமதியார் செயலாலே கவலை

கூறுகெட்ட கொள்கைக்குக்

கும்பிடும் கூட்டமெண்ணி

பொறுக்காமல் கண்ணீரின் திவலை !

நினைவுகளை நெஞ்சினிலே அள்ளு

நினைவுறுத்தி நெருடுமந்த முள்ளு

கனவுகளில் களித்திருந்து

காலமெல்லாம் காத்திருந்து

புனைவுகளாய் ஆனகதை விள்ளு !

உயிரெடுக்கும் ''எய்ட்சு'' என்ற கொள்ளி

உயிரணுவை அழிக்கிறதே துள்ளி

இயம்புகின்ற ஒழுக்கத்தை

இழப்பதனால் வருகின்ற

நோயெதிர்ப்போம் தலைமுறைக்குச் சொல்லி !

கள்விற்க அரசுகாட்டும் நாட்டம்

கல்வியினைக் கைகழுவும் கூட்டம்

கள்பணத்தில் நிரம்பியதைக்

கண்டபடி செலவிடவும்

கள்ளூறும் கடைதிறந்தே ஆட்டம் !

-இராதே

திங்கள், 9 ஜூலை, 2012

தமிழ் வாழ்த்து - காவடிச் சிந்து ( 1 )

அன்னை வண்ணமொழி கூறும் - நெஞ்சில்

திண்ணம் மேவிடவே ஏறும் - தினம்

தான லர்ந்தமலர்

தேன டர்ந்தமொழி தேறும்

நாவி லூறும் !

பின்னை வன்மொழியால் கொள்ளை - நாமும்

இன்னும் உணர்வதே இல்லை - கடும்

ஆண வத்தினுயர்

மான மற்றவர்கள் எல்லை

நீண்ட தொல்லை !

தென்னந் தமிழ்மொழி நாற்றே - சோர்வோர்

தம்மை மகிழ்விக்கும் ஊற்றே - நனி

நாவ ளர்த்தமொழி

பாவ லர்செந்தமிழ்க் கீற்றே !

வீசுங் காற்றே !

கன்னல் என்னும்மொழி மானே - உள

எண்ண மாய்வாழும்என் தேனே - நெடு

நாளும் நின்றுகாக்கும்

காலங் கடந்தநற் றூணே !

வாழ்த்து வேனே !

--இராதே

ஞாயிறு, 8 ஜூலை, 2012

குறும்பா - 1

கரிமத்தால் ஓசோனில் ஓட்டை ;

கரியுமிழும் வண்டிகளின் சேட்டை ;

அரித்துவரும் படலத்தை

அண்டிஊறும் புறஊதா

எரித்திடுமே இயற்கையின் கூட்டை !

கடலலைகள் காலிலிடும் முத்தம் ;

கடற்காற்றின் படபடக்குஞ் சத்தம் ;

இடைவிடாது காத்திருந்தான்

இன்னொருவன் கைப்பிடித்து

கடந்துசென்றாள் அவன்மனத்தில் யுத்தம் !

புகையினில் பற்றுள்ளோர் நேசம் ;

புகைப்பதினால் வந்திடுமே காசம் ;

புகையிழுத்துப் பெற்றஇன்பம்

புற்றுநோயைத் தருவதனால்

புகைப்பவரை இவ்வுலகம் ஏசும் !

அழகள்ளிக் கொட்டுகிற அருவி ;

அழகோசை கீச்சிடுமே குருவி ;

அழைக்கின்ற இயற்கைதனை

அருந்திடவே சுவையூட்டும்

நிழற்படத்தைப் பிடித்திடுமே கருவி !

- இராதே

நிலாதவம்

அடிக்கடி நீ

மலைப் பிரேதசங்களில்

வலம் வராதே

உன்

தொடு உணர்வில் கூச்சப்பட்டு

நெளிந்து குலுங்கியதில்

நிலச்சரிவு !

உன்

பார்வைப்பட்டதும் இளக

தொடங்குகின்றன

பாறைகள்

உன்

பாதம்பட்டால். . . .

அழத்தொடங்கிவிடும்

அருவியாய் !

பாதையில்

கிடக்கும் முட்களுக்கு

உன்

பாதம் குத்தியதில்

மோட்சம் கிடைக்கிறது !

இரத்தத் துளிகளால்

சுத்தமாகிறது !

கோபத்தில்

என் உதடுகள்

முட்களைச்சபிக்கின்றன

அவள்

சரிந்ததில்

மனசு தருகிறது

சாபவிமோசனம்

முட்களுக்கு !

நீ

தடம்பதித்த பாதைகளில்

காலடிச் சுவடுகளை

நான் வருடிப்பார்க்கிறேன்

என்னை

முட்டித்தள்ளி

முந்தப் பார்க்கிறது

காற்று !

அண்ணாந்து வளரும்

மூங்கில் கூட

உன்னைப் பார்த்தது

அவசரத்தில் குனிந்து

அலோ என்கின்றது !

ததும்பும் கள்ளுறிஞ்ச

தவம் கிடக்கும்

தேனீக்கள்

உன்

இதழோரம்

வார்த்தைகள் வழிந்ததும்

நகர மறுக்கின்றன

நனைந்த ஈக்களாய் !

மென்மையின் மேன்மையால்

கர்வப்பட்டு

காற்றில் மிதக்கும்

இறகுகள்

உன்னை

உரசியதால்

நாணப்பட்டு

தரையிறங்குகின்றன !

மலைமுகடுகளில்

உன்

வருகையால்

மேகங்களின் கூட்டம்

அலை மோதுகின்றன

உன்

மேனி தழுவி

தங்களின்

மென்மையைத்

தரம் பிரித்துக்கொள்ள !

தோற்ற மேகங்கள்

கூட்டம் கூட்டமாய்

மூட்டம் போட்டு

தேம்புகின்றன

மலைச் சாரலாய்!

போதும் போதும்

உன்

புறப்பாடு

பொழுதிற்கு முன்னே

இறங்கிவிடு

பாவம் நிலா

தற்கொலை முனையில்

தவம் கிடப்பதாய்க்

கேள்வி!

-இராதே

ஞாயிறு, 1 ஜூலை, 2012

தண்ணீர் காப்போம் !

காரிருள் மேகக் கூந்தல்
கற்றையை முடித்த வானம்
கூரிய முல்லை கூட்டம்
குவிப்பதாய் மின்னல் வெட்டு
சீரிய கூந்தல் சொட்டே
சிதறிடும் மழையாய்த் தூறல்
மாரியாய் விரைவு கூட்டி
மண்ணிலே பொழியும் பாரீர் !

ஓடிடும் மழைநீ ரெல்லாம்
ஓடையி னூடே பாய்ந்தே
ஆடிடும் கடலில் சேர்ந்தே
அடங்கிடும் வீணாய் எல்லாம்
தேடியே குடிநீர் வேண்டித்
தெருவினில் வரிசை யாகக்
கூடிடும் மக்கள் எல்லாம்
குறைதனை உணர்ந்தார் அல்லர் !

தேங்கிய குளங்கள் எங்கே ?
தெளிந்தநீ ரோடை யெங்கே ?
வாங்கிய நீரை வாரி
வழங்கிடும் ஏரி எங்கே ?
வீங்கிய கிணறும் எங்கே ?
விரைந்திடும் நதிகள் எங்கே ?
தூங்கியே வழிந்தோம் நாமே
தொலைந்தன எல்லாம் இங்கே ?

குளங்களை மூடும் போக்கில்
குப்பையைக் கொட்டித் தீர்த்தோம்
வளந்தரும் ஏரிக் குள்ளே
வசதியாய் உழவு செய்தோம்
களங்களாய்க் கிணற்றை மாற்றி
கண்மாயில் மனைகள் போட்டோம்
விளங்கிய நீர்நிலைகள்
விரைவினில் ஒழியக் கண்டோம் !

விண்ணிடை விழுதாய் வீழும்
விசும்பளி துளியைச் சேர்த்து
மண்ணுளே செலுத்தி நீரை
மறுபடி சுரக்கச் செய்து
கண்ணுள ஊற்றாய்ப் பொங்க
கவின்மிகு நதிகள் காண்போம்
எண்ணமாய் நெஞ்சில் ஏந்தின்
இன்பமாய் நடக்கும் காணீர் !

சிந்திடும் நீர்த டுப்போம்
சிக்கனச் செலவு செய்வோம்
வந்திடும் நீரைத் தேக்கி
வளத்தினைப் பகிர்ந்து கொள்வோம்
சந்ததி குடிக்கத் தண்ணீர்
தலைமுறை காண வேண்டிப்
புந்தியில் வைத்தே நீரை
பொறுப்புடன் போற்றிக் காப்போம் !

இராதே

இராதே பக்கங்கள்