கடுக்காய் (62)
மிடுக்காய் நடக்கக் கடுக்காய்
மீட்கும் இளமை துடுக்காய் ;
அடுக்காய் நன்மை வார்க்கும்
'அமுதம்' என்னும் கடுக்காய் ;
தொடுக்கும் நோய்கள் தோற்கும்
தொல்லை பித்தம் எதிர்க்கும் ;
இடுக்கண் கண்நோய்த் தீர்க்கும்
இருமல் , சோகை மாய்க்கும் !
குடலின் புழுக்கள் நசியும்
குடலின் கழிவுகள் நழுவும் ;
உடலின் கட்டி மறையும்
உடலில் வலிமை நிறையும் ;
உடலின் மெலிவு நீங்கும்
உடலில் அழகுத் தேங்கும் ;
இடறும் மூல நோயும்
இல்லா தாக்குங் கடுக்காய் !
வளரும் வயிற்றுப் புண்கள்
வாட்டி வதைக்கும் வாய்ப்புண்,
இளகா மலத்தின் சிக்கல்
எல்லாம் விரட்டுங் கடுக்காய் ;
இளமை யுடனே வாழ
என்றும் உண்போம் கடுக்காய் ;
வளமாய் உடலை மாற்றும்
வரங்கள் ஈணும் கடுக்காய் !
- இராதே
கருத்துகள் இல்லை:
கருத்துரையிடுக