தான்றிக்காய் (78)
தான்றிக் காயாந் தான்றிக்காய்
தடுக்குஞ் சிலந்தி 'விடம்'தடுக்கும் ;
ஊன்றிப் பார்க்கும் கண்நோய்கள்
ஒழங்காய்த் தீர வழிகாணும் ;
தோன்றுந் தொண்டைக் கமறல்கள்
துரத்திக் குரலை வளப்படுத்தும் ;
ஆன்ற மருந்தாய் அணிவகுத்தே
அனைத்துங் காக்குந் தான்றிக்காய் !
வயிற்றுள் நெளியும் புழுக்களும்
வளரும் குடலுள் புழுக்களும்
வயிற்றுப் போக்கும், பொருமலும்
மறந்தும் வராமல் நிறுத்திடுமே ;
மயிர்க்கால் உதிர்தல் அகற்றிவிடும்
மலத்தை இளக்கி விலக்கிவிடும்
உயிரை எடுக்கும் மூச்சழற்சி
உறுத்தல் தவிர்க்குந் தான்றிக்காய் !
உடலைத் தேற்றி ஒளியேற்றும்
உருட்டுஞ் சளியை அறுத்துவிடும் ;
குடலுள் நுண்மிக் கொன்றுவிடும்
குருதி மூலம் மட்டுப்படும்
தொடரும் வாந்தி, நாவறட்சித்
தொல்லை எல்லாம் ஓடிவிடும் ;
கடமை யாற்றி நமதுடலைக்
காக்குங் காயாந் தான்றிக்காய் !
- இராதே
கருத்துகள் இல்லை:
கருத்துரையிடுக