தக்காளி
நலன்கள் புரியுந் தக்காளி
நாளும் உண்ணுந் தக்காளி ;
புலன்கள் தூண்டிச் சுறுசுறுப்பைப்
புகுத்தும் பழமே தக்காளி ;
உலர்த்தி வயிற்றுப் புண்ணாற்றும்
உறுத்துந் தொற்றை ஒழித்துவிடும் ;
மலரும் முகத்தை அழகேற்றும்
மருந்தாம் உணவுத் தக்காளி !
சிறுநீர் எரிச்சல் நீர்க்கடுப்புச்
சீர்மைப் படுத்தி நலங்காக்கும் ;
உறுமும் சிரங்குத் தோல்புண்ணை
உதறி ஓட்டித் தோல்காக்கும் ;
இறுகும் மலத்தை இளக்கிவிடும்
இனிப்பு நீர்க்குத் தடைநிற்கும் ;
குறுகும் பார்வைக் கூர்மையுறும்
குருதிப் பெருக்கம் எழுச்சியுறும் !
உடலின் வீக்கம் வடித்துவிடும்
உடலின் வெப்பம் தணித்துவிடும் ;
உடலின் எடையைக் குறைத்துவிடும்
உடலின் வலிமை பெருக்கிவிடும் ;
திடமாய்ப் பற்கள் உறுதியுறும்
திருக நரம்பும் முறுக்கேறும் ;
கடமை தீரன் தக்காளி
காக்கும் வீரன் தக்காளி !
- இராதே
கருத்துகள் இல்லை:
கருத்துரையிடுக