பனங்கிழங்கு
பிட்டும் கூழும் ஒடியலிட்ட
உணவின் வகையாய்க் கொள்ளலாம் ;
சுட்டுந் தீயில் கருக்கியும்
சுட்ட நீரில் அவித்துமே
இட்டம் போல தின்னலாம்
இனிப்பு நீரை வெல்லலாம் ;
எட்டும் இரும்புச் சத்துகள்
எடுத்து ஊட்டும் பனங்கிழங்காம் !
உருண்டக் கூம்பின் வடிவமாம்
உழலுஞ் சோகை ஓட்டுமாம் ;
திருகும் ஒற்றைத் தலைவலி
தீர உதவுங் கிழங்கிதாம் ;
நெருக்கும் வயிற்று வலியிதனை
நீங்க வழிகள் காட்டுமாம் ;
இறுகும் மலத்தை இளக்கிய
இயல்பாய்ப் போக்குங் கிழங்கிதாம் !
பனையின் வேரில் தோன்றுமாம்
பலத்தை உடலில் கூட்டுமாம் ;
வினைகள் புரிந்த நோய்களை
விரட்டி விரட்டி அடிக்குமாம் ;
முனைந்தே கருப்பை வளத்தினை
முன்னம் நின்று வழங்குமாம் ;
சினைக்குஞ் சிறுநீர்க் கற்களைச்
சீராய்க் கரைத்தே அகற்றுமாம் !
- இராதே
கருத்துகள் இல்லை:
கருத்துரையிடுக