வாழைக்காய்
குடலின் கழிவை வெளித்தள்ளும்
குடலைத் தூய்மைச் செய்திடுமே ;
உடலின் எடையைக் குறைத்திடுமே
உணர்ச்சிப் பெருக்கைத் தடுத்திடுமே ;
தொடரும் இருமல், வயிற்றிரைச்சல்
தொல்லை மறைய வைத்திடுமே ;
படருங் கண்ணின் புரைநோயைப்
பற்ற விடாமல் முனைந்திடுமே !
குருதி இனிப்பை நிலைப்படுத்தி
குருதி அழுத்தம் சமப்படுமே ;
உருட்டும் மூட்டு வலித்தீர்க்கும்
உளைச்சல் மூலம் சரிபடுமே ;
பெருகும் மூளைச் சுறுசுறுப்பு ;
பேணும் இதய நலங்காப்பு ;
அருகும் முதுமைத் தோற்றமுமே
அழகாம் இளமைப் பொலிவுறுமே !
அண்டும் நோயை எதிர்த்திடுமே
அடைக்கும் மலத்தைப் புறந்தள்ளும் ;
நிண்டும் புற்று நோயழிக்கும்
நெளியும் எலும்பு வலிமையுறும் ;
மண்டுந் தொற்றுந் தெறித்தோடும்
மலிவு மருந்தாம் வாழைக்காய் !
உண்டுப் பயன்கள் பெற்றிடுவோம்
ஓங்கும் நலத்தில் மகிழ்ந்திடுவோம் !
- இராதே
கருத்துகள் இல்லை:
கருத்துரையிடுக