சுண்டைக்காய்
சொத்தைப் பல்லும் வாய்ப்புண்ணும்
சுவடே இல்லா தொழிந்துவிடும் ;
சத்தாம் இரும்பின் இருப்பதிகம்
தாய்ப்பால் சுரப்பு மேலோங்கும் ;
மெத்த சோர்வு, மூட்டுவலி
முனகிப் புலம்பி வெளியேறும் ;
ஒத்து வராத புளியேப்பம்
ஓட விரட்டும் சுண்டைக்காய் !
வெள்ளை அணுக்கள் குருதியிலே
வெகுவாய்ச் செழிக்க ஒத்துழைக்கும் ;
தொல்லை இருமல், மார்புசளி
துவண்டே நடுங்கி அகண்டுவிடும் ;
கொல்லும் வயிற்றுப் பூச்சிகளை,
குறைக்கும் மூலக் கடுப்புகளை ;
கல்லீ ரல்நோய்த் தொற்றடக்கிக்
காக்கும் மருந்தே சுண்டைக்காய் !
உருக்கும் காச பிணிமாய்க்கும்
உறையுங் குருதிக் கொழுப்பெடுக்கும் ;
சுருங்கும் வயிற்றுக் கோளாறு
சுகமே காணும் மண்ணீரல் ;
நெருக்க மாக பணியாற்றும்
நேயம் மிகுந்த சுண்டைக்காய் ;
மெருகுக் கூட்டி உடல்போற்றும்
மேன்மை சிகரம் சுண்டக்காய் !
- இராதே
கருத்துகள் இல்லை:
கருத்துரையிடுக