விளாம் பழம்
இனிப்புத் துவர்ப்புப் புளிப்பொடும்
இனிய சுவையைத் தரும்பழம் ;
கனியுங் காயும் இலைபிசின்
களைந்த பட்டை வேர்களும்
தனித்துப் பிரியும் ஓடுமே
தரமாய் நல்கும் மருத்துவம் ;
அணிகள் வகுத்து நன்மையை
அரணாய்க் காக்கும் பழமிதே !
பிசினைப் பொடித்தே உண்பதால்
போக்குங் குருதி நின்றிடும் ;
பசியின் மந்தம் விடுபட
பயனாய் வாய்த்த இப்பழம் ;
மசிய இடித்த மரப்பட்டை
மாற்றும் வாயின் கசப்பதை ;
கசியுங் கோழை அகற்றிட
கருணைச் செய்யும் விளாம்பழம் !
பித்தம் வாந்தித் தலைவலி
பிதற்றும் வாயின் புண்களை
நித்தம் நின்றுப் போக்கிடும் ;
நிலைமை சீராய் மாற்றிடும் ;
சுத்தம் செய்து குருதியைத்
தொற்றும் அணுக்கள் நீக்கிடும் ;
மெத்த மகிழ்ந்தே உண்ணுங்கள் ;
மேன்மை பழமாம் விளாம்பழம் !
- இராதே
கருத்துகள் இல்லை:
கருத்துரையிடுக