கொத்துமல்லி
மயக்கம் அறுக்கும் மாமருந்து
மனநோய்த் தீர்க்கும் மாமருந்து ;
துயரங் கொடுக்கும் மதுமயக்கத்
துன்பம் நீக்கும் மாமருந்து ;
தயக்க மின்றிப் பசித்தூண்டும்
சாம்பார், ரசத்தில் உணவாகும் ;
பயன்கள் பலவும் தந்திடுமே
பண்பில் மணக்கும் கொத்துமல்லி !
நரம்பு, எலும்பு மண்டலங்கள்
நலங்கள் மேவப் பாடுபடும் ;
பரவுந் தோலின் நோய்த்தொற்றைப்
பதுங்கி ஓடச் செய்துவிடும் ;
திரையும் புரையும் விழிகளிலே
தீண்டா வண்ணம் துணைநிற்கும் ;
இரவில் இனியத் தூக்கத்தை
இயல்பாய் அருளும் கொத்துமல்லி !
எத்தும் குடற்புண் மறந்தோடும்
எளிதில் செரித்தே உடல்தேற்றும் ;
பித்தக் காய்ச்சல் மிரண்டோடும்
பிணிகள் பலவும் அரண்டோடும் ;
மெத்த மூளை வளர்ச்சியுறும்
மேனிக் கட்டு வலிமையுறும் ;
கொத்து மல்லி சிறப்புகளைக்
கொணர்ந்தே உணவில் பயன்கொள்வோம் !
- இராதே
கருத்துகள் இல்லை:
கருத்துரையிடுக