கறிவேப்பிலை ( கறிவேம்பு )
வாந்தி, குமட்டல், தலைசுற்றல்
வாய்ப்புண், சோகை, வயிற்றிரைச்சல்
சீந்தும் மூலம், சீதபேதி
சீறும் பித்த நோய்களை
ஏந்தும் உடலைச் சீராக்கும் ;
இயற்கைக் கொடையே கறிவேம்பு ;
வேந்தாய் நின்று நலங்காக்கும்
விழையும் பயன்கள் விளைவிக்கும் !
உதிரும் முடியும், இளநரையும்
உடனே நின்று கருகருக்கும் ;
புதிராய்த் தோன்றும் நீரிழிவைப்
புரிந்துக் குறைக்க வழிகோலும் ;
எதிர்க்கும் ஆற்றல், நோய்த்தடுப்பும்
எல்லாம் ஈணும் கறிவேம்பு
எதிரி போன்றே ஒதுக்காமல்
இயல்பாய்ச் சேர்த்தே உண்ணுங்கள் !
தெளிவாய்ப் பார்வைத் திறன்கூடும்
சிதையும் ஈறுகள் வலிமைபெறும் ;
களிங்குங் கெட்டக் கொழுப்புகளைக்
கரைக்கக் குருதித் தூய்மையுறும் ;
எளிய மருந்தே கறிவேம்பு
எங்கும் கிடைக்குங் கறிவேம்பு ;
துளியும் அதனைத் தவிர்க்காமல்
தொடர்ந்தே உண்டு மகிழுங்கள் !
- இராதே
கருத்துகள் இல்லை:
கருத்துரையிடுக