காத்துவாரியை
வெறித்தபடி இருந்தேன்
சிலந்தி பின்னிய வலையில்
சிறைபட்டிருந்தது
பிறைநிலா
காற்று வீச
பிணையில் வருமா நிலவு ?
சிந்தனைகள் நேரங்களை
இழுத்து சென்றன
விண்மீன்கள்
கூடிகூடி பேசியவாறு இருந்தன
மேகங்கள் அங்கும் இங்கும்
அலைமோதித் திரிந்தன
நீளும் இரவில்
நீள்வட்டத் திரையை மறைத்தது
கண்மூடும்
என் இமைகள்
- இராதே
மல்லாந்து படுத்திருந்தேன்
பாறையின் இடுக்கில்
தொடமுடியாத இடத்தில்
தொங்குந் தேன்கூடு
எப்பொழுது வேண்டுமானாலும்
விழலாம்
காத்துக் கொண்டிருக்கிறது
பழுத்தோலை
கூட்டைத் தாங்கும் கிளையில்
முட்டையைத் திருட
ஊர்ந்து நெளியும்
பாம்பு
கலையா கருமேகங்களின் நிழல்
பைய வருடிச் செல்கின்றன
நிமிர்ந்து அமர்கிறேன்
இதையெல்லாம்
சட்டை செய்யாமல்
கடமைக்கு ஓடிக்கொண்டிருந்தது
ஆறு
- இராதே
ஒரு கூவலுக்கும்
ஏழெட்டு கூவலுக்கும்
சட்டென நிறுத்தி தொடர்கிறது
கேட்டு வெகுநாளாகி இருந்தது
அதிகாலை வேளையில்
குயில் பேசும் 'கமுக்கமொழி'
இங்கு பேசுபவைகளையே
புரிந்துகொள்ள முடியவில்லை
குயில்மொழிக்கு
எங்கே பொருள் தேடுவது ?
புரியாதவர் உலகில்
புரிந்து கொள்ளாதவர் இடையே
புரிந்து கொண்டார் போல
மொழிவது தான்
சரியான புரிதல்
- இராதே
பறித்து எடுத்து
சூடுகிறாள்
இடந்தவறி விழுகிறது
ஒற்றை மலர்
பிஞ்சு கைகளென
ஏமாந்தது தான்
மிச்சம்
கால்பட்டு இடரும்
மலர்கள்
பாதுகாப்பாய் வைத்திருந்த
முள்களையே நேசிக்கின்றன
- இராதே
இமைகள்
விழிகளை நொடியில் காக்கும் ;
விழும்பொருள் தடுத்து நிற்கும் ;
எழிலுறு முகமாய்க் காட்ட
இயல்புடன் அழகுக் கூட்டும் ;
வழிகிற கண்ணின் நீரை
வழித்திட உடனே மூடும் ;
பொழில்தரும் பூக்கள் போல
புலர்ந்திடும் இமைகள் தாமே !
இளமையின் ஆவ லாலே
இரப்பைகள் துடிக்கும் மெல்ல
வளமிகு சிமிட்டல் கண்டு
வளருமே வளமை காதல்
அளவிடும் பணியின் இன்பம்
அழகுற பதிக்க வைத்து
களவிட மனத்தைத் தூண்டி
கமுக்கமாய் ஏவல் செய்யும் !
- இராதே
அருமறை காதல் !
(எழுசீர் :
விளம் - மா - விளம் - மா
விளம் - விளம் - மா)
கருவிழி வண்டு 'கதகளி' ஆடிக்
கண்ணிமைத் திரையினைத் தூக்க
இருவிழித் துழாவி இருகிய உள்ளம்
இளகிய நுங்கென மாற
ஒருவழி மோதல் ஒருவழி காதல்
ஊஞ்சலில் ஆடிடும் பெண்ணே !
தெருவழி நடந்து நின்முகங் காண
தேய்ந்தன தேய்ந்தன கால்கள் !
திருகியத் தேங்காய்த் துருவலின் பூவாய்த்
தெரிந்திடும் பற்களின் வெண்மை
உருகிய நெய்யின் ஒளிர்விடும் பாங்கை
உடுத்திய மேனியின் வண்ணம்
பருகிடத் தூண்டும் பனிமலர் செவ்வாய்
பரவிடுந் தேனிதழ் ஊற்று
நெருங்கிடத் தீண்டும் நினைவுகள் என்னில்
நிகழ்ந்தன நிகழ்ந்தன கண்ணே !
சருகென நெஞ்சம் சலசலப் போடு
சலங்கையின் ஒலியினில் துள்ளும்
மெருகுறு மஞ்சள் மேவிய கன்னம்
மென்மையின் மேன்மையைச் சொல்லும்
அருகினில் அழைத்தே ஆசையைச் சுவைத்தே
அணைத்திடும் முத்தங்கள் அள்ளும்
அருமறை ஓதும் அழகியல் காதல்
அலைபடும் மஞ்சத்தை வெல்லும் !
- இராதே
கஜல் - 8
நான்பூந் தென்றல் ! கதவுகள் ஏனோ அடைக்கிறாய் ?
நான்குளிர் வாடை ! கம்பளிக்குள் ஏன் நுழைகிறாய் ?
நான்விழி வெண்படலம் ! கண்களை ஏனோ மூடுகிறாய் ?
நான்குருதிப் புனல் ! சினத்தில் ஏன்தான் முறைக்கிறாய் ?
நான்உன் உள்ளே ! வெளியே துரத்த முடியாது !
நான்உயிர்த் துடிப்பு ! மூச்சை நிறுத்த முடியாது !
நான்உன் உணர்வு ! நினைவைத் துறக்க முடியாது !
நான்உன் உலகம் ! காதல் நெகிழ்வுகள் மடியாது !
- இராதே
கஜல் - 7
'துறுதுறு' கண்களால் துழாவி நிற்பாயே !
துடிக்கும் நெஞ்சை மிரட்டவா ? உருட்டவா ?
'விறுவிறு' பார்வையை விலக்கி வைப்பாயே !
விஞ்சிடுங் காதலை மறைக்கவா ? மறக்கவா ?
கனவுகள் உண்ணும் கண்களில் வாளேன் ?
காதல் உணர்வை நறுக்கவா ? திறக்கவா ?
நினைவுகள் தூண்டும் நீண்டிடும் நாளேன் ?
நின்னுணர் ஏந்த மறுக்கவா ? சுமக்கவா ?
- இராதே
தண்ணீர்த் தவம் !
கண்ணே கதை கேளு !
கண்மணியே கதை கேளு !
பொன்னே கதை கேளு !
பூமணியே கதை கேளு !
( கண்ணே )
தொடுப்பு
தண்ணீர் வந்த கதை !
தாகந்தான் தீர்ந்த கதை !
கண்ணீர் நிறைந்த கதை !
காலங்கள் நனைக்கும் கதை !
( கண்ணே )
முடிப்பு
ஆயி அழுத கண்ணீர்
ஆறாகப் பெருகி வந்தே
ஆளும் நகர்நனைத்த
அன்புநீர் வார்த்த கதை !
தாயி உதிர்த்த செந்நீர்
தானாகப் பெருகி வந்தே
தவிக்கும் வாய்க்க ளித்த
தாயன்பு சுரந்த கதை !
( கண்ணே )
பொறிஞர் " லாம ரெசின் "
பொறுப்பானப் பெருந் தவத்தால்
பொங்கும் பூம்பு னலாய்ப்
புதுவைக்கு வந்த தண்ணீர் !
அறிஞர் அவர்தொ டுத்த
ஆற்றல் மிகுசூ ளுரையால்
ஆறாய்ப் பாய்ந்து வந்த
ஆரமுத நீரின் கதை !
( கண்ணே )
- இராதே
இரவச்சம்
உள்ளவற்றை மறைக்கின்ற நோக்கம் இன்றி
உதவிடவே இருக்கின்றார் செல்வர் என்றே
பள்ளத்தில் பாய்கின்ற நீரைப் போலே
பரிவுடனே கையேந்தி கேட்டல் தீதே !
வெல்லத்தை நாடுகின்ற எறும்பைப் போன்றே
வேண்டிவேண்டி இரப்பதுவும் நன்றும் அன்றே;
செல்வங்கள் இல்லாத நிலையில் கூட
சென்றெங்கும் இரவாமை சிறப்பின் மேன்மை !
கையேந்திப் பிச்சையினைக் கேட்போர் காணின்
கண்துளிர்க்கும் கல்மனமும் கரையுந் தேம்பும்;
பொய்யேந்தி மறைக்கின்ற பொல்லாச் செல்வர்
பொருளனைத்தும் பயனின்றிப் பாழாய்ப் போகும்;
நொய்யரசி கஞ்சியதே உணவா னாலம்
நுகர்கின்ற உழைப்பாலே கிடைத்தால் இன்பம் ;
பொய்ப்பேசி ஊரெல்லாம் இருகை நீட்டிப்
புகழ்ப்பிச்சை எடுப்பதுவே வாழ்வின் துன்பம் !
இழிநிலையே நேரிடினும் இரக்கம் இல்லார்
இல்லத்தில் பிச்சையினைக் கேட்க வேண்டாம் ;
பொழிகின்ற செல்வங்கள் மறைக்குந் தீய
பொல்லாதார் பொருள்கேட்டே அலைய வேண்டாம் ;
பழிமிரட்டும் தீச்செயல்கள் தீர நாளும்
பல்லிளித்து பிச்சைதனை எடுத்தல் என்றே
மொழிகின்ற மூடத்தன முட்டாள் கூற்றால்
முடங்கிடுமே மானமுமே பிச்சை கேட்டால் ?
"கட்டை விரலி"
(கதை பாடல்)
அன்னை ஒருத்தி வாழ்ந்தனள்
அழகு குழந்தை வேண்டியே ;
முன்னை இயற்கை கடவுளை
முனைந்து மூழ்கி வேண்டினள் ;
பின்னை அவளின் வேண்டுதல்
பிள்ளை யாக தோன்றியே
வண்ண மலரின் இதழிலே
வடிவில் குறைந்து தவழ்ந்தது ! (1)
கட்டை விரலின் அளவிலே
கண்டெ டுத்த மகவினைக்
'கட்டை விரலி' எனப்பெயர்
களிப்பில் உவந்து சூட்டினள்;
சொட்டுத் தேனின் பூவிலே
துவளுங் குழவித் தூங்கிடக்
கொட்டைப் பாக்குத் தோலிலே
குலுங்குந் தூளி செய்தனள் ! (2)
வெட்டுக் கிளிகள் எறும்புடன்
விரையும் பட்டாம் பூச்சிகள்
கட்டை விரலி நண்பராய்க்
கனிவு பொங்கக் கூடின ;
தோட்டம் முழுதுஞ் சுற்றியே
சோர்வி லாமல் நாளுமே
கொட்டம் அடித்து பாடியே
கூடி ஆடி மகிழ்ந்தன ! (3)
ஆடுங் கட்டை விரலியை
அழுக்குத் தவளை பார்த்தது
ஓடும் வழியை மறித்தவள்
ஒளிரும் எழிலில் கிளர்ந்தது;
கேடு கெட்ட எண்ணத்தில்
கிறங்கி தவளை விரலியைப்
பாடும் வாயால் கவ்வியே
பாய்ந்து நீரில் மறைந்தது ! (4)
வாடி எந்தன் செல்லமே
வருக எந்தன் இல்லமே
தேடி வந்தேன் மருமகள்
தேவன் எந்தன் மகனுக்குக்
கூடி உன்னை மணஞ்செய
கொண்டு வந்தேன்
நானடி
ஆடிப் பாடிக் கனவிலே
அழுக்குத் தவளை மிதந்தது ! (5)
தேடி வருவேன் மகனோடு
தேவி நீயுந் தாமரை
ஊடி வளரும் இலையிலே
ஒளிந்து நிற்பாய் வருகிறேன் ;
பேடி தவளை மறைந்தது
பேதை விரலி அழுதனள் ;
வாடி நின்ற விரலியை
வண்ண மீன்கள் சூழ்ந்தன ! (6)
அழுகை வேண்டாம் விரலியே
அன்பாய் மீன்கள் உதவுவோம் ;
முழுகுங் கமலத் தண்டினை
முந்தி மீன்கள் கடித்தன
வழுக்கி வீழ்ந்த தண்டிலை
வாகாய் ஓட மாக்கியே
முழுதுஞ் சுமந்து விரலியை
முடிவாய்க் கரையில் சேர்த்தன ! (7)
கறக்கும் மடியை முட்டிடும்
கன்று போல விரலியை
பறக்கும் பட்டாம் பூச்சிகள்
படையெ டுத்து சூழ்ந்தன ;
மறந்தி டாமல் விரலிக்கு
மனது வைத்து உதவின;
சிறந்த நட்பின் சின்னமாய்ச்
சிறகை அடித்து மகிழ்ந்தன ! (8)
பட்டாம் பூச்சி தகவலால்
பறந்து வந்த சிள்வண்டு
விட்டி டாமல் விரலியை
விரைந்து சென்று மீட்டது ;
கட்டித் தழுவி விரலியோ
கண்ணீர் மல்க நன்றியை
ஒட்டு மொத்த மாகவே
உதவி னோர்க்கே ஈந்தனள் !
- இராதே
ஆனந்த களிப்பு
மறைமலை அடிகள்
மறைமலை அடிகளார் என்றே - தமிழில்
மாற்றிய தன்பெயர் வைத்தாரே நன்றே !
துறைபல அறிவுகள் வென்றே - மொழி
துளிர்த்திட உழைப்பினை ஈந்தாரே அன்றே !
சொற்றமிழ் கலப்புகள் கொன்றார் - தூய
சொற்படுந் தனித்தமிழ் வழியினில் சென்றார் !
நற்றமிழ் காத்திட நின்றார் - நாளும்
நற்பயன் மேவிடும் செம்மொழி கண்டார் !
சிவனியம் தமிழுமே மூச்சு - அதை
சிறப்புற செயல்பட தொடர்ந்தார்நல் பேச்சு
கவணுறு தனித்தமிழ் வீச்சு - எங்கும்
கவின்மிகு செந்தமிழ் வீற்றிடுங்கோ லேச்சு !
நனிமொழி எதிர்ப்போரின் சந்தை - வீழ
நயம்பட போரிட்ட ஆர்த்தெழு எந்தை !
தனித்தமிழ் இயக்கத்தின் தந்தை - இவர்
தாய்மொழி செழித்திட செய்தாரே விந்தை !
- இராதே
தொடர்வண்டி
'தடதட' 'கடகட' தொடர்வண்டி
தாளங்கள் போட்டிடும் தொடர்வண்டி ;
அடர்நிலை காடுகள் உள்நுழைந்தே
அழகிய இயற்கையின் முகங்காட்டும் ;
வடம்பிடிக் கயிறென உடல்நீண்டு
வளைவொடும் நெளிவொடும் பயணமிடும் ;
'மடமட' மடவென மைல்கடக்கும்
மனம்போல விரைந்திடும் தொடர்வண்டி !
மலைமேலே முகடுகள் ஊர்ந்தேறும்
மடுவுகள் அடைந்திட வழிந்தூரும்
அலைபடக் காற்றினைக் கிழித்தேகி
அடைந்திடும் இலக்கினைத் தொடர்வண்டி ;
உலைபட்ட இரும்புத்தண் டவாளத்தில்
உறுதியாய் இயங்கிடுந் தொடர்வண்டி ;
நிலையங்கள் நேரத்தில் சென்றடையும்
நின்றுபின் பயணத்தைத் தொடர்ந்துவிடும் !
- இராதே
27.12.2016
சொற்கேட்டல் இன்பம் !
படுக்கையில் கால்கை ஆட்டிப்
படிகளில் தவழ்ந்தே யேறித்
தடுக்கியே விழுந்து வாரித்
தத்தியே நடக்கக் கற்று
அடுப்படி நுழைந்து சுற்றி
ஆக்கிய சோற்றைக் கொட்டிக்
கொடுக்குகள் அடிக்கும் கொட்டம்
குளிருதாம் மனத்துள் இன்பம் !
அடுக்கிய உடைகள் பொம்மை
அனைத்தையும் அள்ளி வீசி
இடுக்கிலே புகுந்து வந்தே
எட்டியே குறும்பாய்ப் பார்த்துத்
துடுக்காக ஓடி யாடித்
துள்ளியே துள்ள லோடே
சொடுக்கிடும் நொடிக்குள் ளாக
சுழன்றாடும் மழலை இன்பம் !
சுண்ணாம்புச் சுவற்றி லெல்லாம்
சுரண்டியே கிறுக்கி வைத்துக்
கண்ணாடிக் கதவைத் தட்டிக்
கற்கண்டாய்ச் சிதற விட்டுப்
பின்னாடி ஒளிந்து நின்று
பிறைபோலே எட்டிப் பார்த்து
முன்னாடிக் குழையும் பிஞ்சின்
முகத்தாடல் கொள்ளை இன்பம் !
அன்னைமுந் தானைப் பற்றி
அடிக்கடி காலைச் சுற்றிக்
கண்ணாக வளர்க்குந் தந்தை
கைகளில் பிடித்துத் தொங்கி
வண்ணமாய்க் கொஞ்சிக் குலாவி
வாயாற முத்த மிட்டே
எண்ணத்தை ஆளும் செல்வ
இளம்மழலைச் சொற்கள் இன்பம் !
தன்மக்கள் தீண்டல் இன்பம்
தரத்தாலே உயர்ந்த தென்பார்;
வெண்சங்கும் குழலும் யாழும்
வெற்றிசைதான் மழலை முன்னே ;
இன்சொல்லாய் அவர்தம் சொற்கள்
இசைக்கின்ற சொற்கள் தானே ;
இன்பமுறு மக்கள் பேறே
இனிதான தென்பான் ஐயன் !
இன்னிசையில் உலகம் சொக்க
இயம்புகிற சொற்கள் யாவும்
மண்ணசைக்கும் மழலை முன்னர்
மண்டியிடும் சொற்கள் தாமே;
விண்ணுயர நின்ற ஐயன்
விருப்புடன் மக்கள் பேற்றின்
மாண்புகளைச் செவிக்குள் ஈந்தே
மகத்தான குறள்தந் தானே !
- இராதே
அன்னை தெரெசா பிள்ளைத்
காப்புப் பருவம்
'இமயம்'
(32 சீர் விருத்தம்)
பரிதி விரிகதி ரொளிர மலையுறு
படல உறைபனி வெள்ளொளி விட்டெழும்;
பரவி உருகிட நழுவு நனிபனி
பருவ நடையினை யிட்டெழ மெட்டிடும்;
பசுமை வரையினை அணியுந் துகிலெனும்
பனியின் புகைபட ஒட்டறை நெட்டிடும் ;
படிக எதிரொளி யிடற மழைதரு
படித லமைவுற முட்டிடுங் கொட்டிடம் !
அரிது மலைவிழு மருவி தருமொரு
அரிய இசையெழ மத்தள மிட்டிடும் ;
அரவு வளைவென ஒடிய நடமிட
அலையும் வழிகளுங் கிட்டிடும் , கிட்டிடும் ;
அகிலின் மணமெழ அமல அசைவினை
அருளு மலையுடை வட்டிகை ஒத்திகை ;
அடநம் பெருகிடும் அமர ருலகினை
அடவி விரவிட நெட்டிடை முட்டிடும் !
பெரிய மடலிதழ் அவிழ மலரினம்
பெருக நறுமணம் புக்கிடம் சொக்கிடும் ;
பிடகை மரமிகு நிறைவு மெருகிடும்
பெருகு மலைவளம் செப்பிடும் அப்பிடும் ;
பெடையின் துணையொடு பரவும் சிறகினம்
பிணைவு மகிழுற முத்திடும் கத்திடும் ;
பிளிறு களிறுடன் பிடியு முலவிடும்
பெருமை இமமலை நல்லழ கெட்டிடும் !
உரிய உதவிக ளுதவும் குணமக
ளுருகு வறியவ ருற்றது விட்டிட
உலகு முழுவது மிளிர உலவிடு
முதய நிலவொளி வட்டெழு வித்தகி
உயர நிலையுடை ஒழுகு பணிவினை
உணரு மதியுடை நல்லவ ளுள்ளுய
ருறவு மலருறு மிமய மலைமக
ளொளிர அருளுக நற்றுணை யெட்டவே !
- இராதே
தேநீர்
அலைகள்
எழுத்து
துயில்
சுவடு
இலையுதிர் காலம்
களிமண்
பனித் துளி
ஓவியம்
வடிவியல்
வசந்தம்
அருவி
தூரம்
நிலா மயக்கம்
படித்துறை
கதவு
தம்புரா
கொலுசு
அமைதி
பொழுது
நடை
திருடும் கண்கள்
