தேநீர்
புல்வெளியின் நடுவத்தில்
போடப்பட்டிருந்த மேசையின் மேல்
கண்ணாடிக் கோப்பை
முக்கால் வாசி வெந்நீர்
கால் வாசி காற்று
கரைந்துகொண்டிருந்த
துகள்பையின் மணம் பரவுகிறது
செய்தித் தாளை விடுத்து
பார்வையைத் தாழ்த்துகிறேன்
ஆவிபறக்கும் தேநீர்
மிடறு மிடறாய் இறங்குகிறது
சுடச்சுடச் செய்திகள்
இதமான மிடறுகளில்
இடையிடையே சிக்கிக் கொள்கின்றன
நிகழ்கால அவசரங்கள்
காய்கறிகாரியின் குரலுக்கு
சென்று திரும்பும் பார்வை
கடைசி மிடறுக்குப்பின்
கோப்பையை நிறைத்து விடுகிறது
காற்று
மற்றொரு முறை
தாழ்கிறது பார்வை
தேநீர் தேடி
- இராதே
கருத்துகள் இல்லை:
கருத்துரையிடுக